Lufta për Bakhmutin intensifikohet ndërsa forcat ruse përpiqen të “thyejnë” linjat e mbrojtjes ukrainase
Zëvendësministrja ukrainase e Mbrojtjes, Hanna Malyar, ka thënë se luftimet në Bakhmut ishin “përshkallëzuar”, ndërsa forcat ruse përpiqen të “thyejnë” linjat e mbrojtjes ukrainase që janë mbajtur kryesisht të qëndrueshme gjatë gjashtë muajve të fundit.
Sipas mediave të huaja, në perëndim të Bakhmutit, bombardimet dhe sulmet me raketa goditën qytetin Kostiantynivka të kontrolluar nga ukrainasit.
Zyra e prokurorit rajonal theksoi se tetë persona u plagosën dhe më shumë se një duzinë shtëpi u dëmtuan ose u shkatërruan nga sulmet.
Të paktën katër persona raportohet se u plagosën dhe u dërguan në një spital lokal. Policia ukrainase tha se forcat ruse sulmuan qytetin me raketa S-300 dhe “municione thërrmuese”.
Sulmi rus i së enjtes para agimit ishte sulmi më i madh i tillë në tre javë me më shumë se 80 raketa ruse dhe dronë shpërthyes.
Breshëria, e cila dëmtoi edhe ndërtesat e banimit, vrau gjashtë persona dhe la qindra mijëra pa ngrohje dhe ujë të rrjedhshëm.
U vra në betejën për Bakhmutin, i jepet lamtumira Heroit të Ukrainës, i pranishëm edhe Zelensky
Mijëra njerëz, përfshirë presidentin e Ukrainës, i dhanë lamtumirën e fundit në Kiev “Da Vinçit”, një hero lufte që u vra nga rusët në betejën për Bakhmutin, pikën “më të nxehtë” të frontit në Ukrainën lindore .
Volodymyr Zelenskiy dhe kryeministrja e Finlandës Sanna Marin morën pjesë në homazhet e nderit në Sheshin e Pavarësisë në qendër të kryeqytetit për të nderuar Dmytro “Da Vinçi” Kociubailo, një vullnetar 27-vjeçar që komandonte batalionin “Ujqërit” të Da Vinçit”.
Presidenti Zelensky njoftoi vdekjen e tij të martën.
Dmytro “Da Vinci” Kochiubailo ishte luftëtari më i ri që u nderua nga Zelensky, në dhjetor 2021, me Urdhrin e Heroit të Ukrainës, nderimi më i lartë i vendit.
I pranishëm në shesh, shefi i shtabit të përgjithshëm të ushtrisë, Valery Zaluzny, u gjunjëzua pranë arkivolit. “Rruga drejt fitores tonë është shumë e vështirë. Dhe çmimi i fitores është jeta e luftëtarëve tanë, qytetarëve më të mirë ukrainas që mbrojtën vendin me armë në dorë. Të jeni të sigurt se nuk do të kufizohemi vetëm në hakmarrjen (vdekjen tuaj), me siguri do të fitojmë. Pusho në paqe, miku im”, tha Zaluzny.
Në vitin 2014 “Da Vinçi” u plagos rëndë nga një predhë tanku në Pisky, rajoni Donetsk. “Pas shërimit dhe tre muajve rehabilitim, ai u kthye në front, ku vazhdoi të mbrojë sovranitetin dhe integritetin territorial të Ukrainës”, thanë forcat e armatosura të Ukrainës.
Në vitin 2016, Kotsiubailo u bë komandanti më i ri në historinë e ushtrisë ukrainase.
Orban paralajmëron shpërthimin e një “Lufte të Tretë Botërore”
“Bota është më afër se kurrë që një konflikt lokal të kthehet në një luftë botërore”, tha kryeministri hungarez Viktor Orban për radion publike ditën e djeshme.
Udhëheqësit e botës perëndimore "janë të kapluar nga ethet e luftës, ata mbajnë fjalime duke bërë thirrje për fitore në luftë dhe viktima të tjera dhe dërgojnë armë gjithnjë e më të rrezikshme në Ukrainë," tha Orban në një intervistë.
Në vend që të promovohet njëzëri paqe, bota është e ndarë, vuri në dukje Orban. Turqia dhe shtetet arabe, Kina dhe vendet afrikane duan një armëpushim dhe negociata paqeje, beson ai. Në të njëjtën kohë, Hungaria është "në thelb i vetmi" vend evropian që është në favor të paqes, së bashku me Vatikanin. Shtetet që shkojnë në luftë motivohen nga "spekulimet e biznesit, konsideratat e politikës së mbrojtjes dhe ekonomike dhe llogaritjet e avantazheve të luftës" aq sa përkushtimi ndaj parimeve dhe fesë”, thekson Orban.
Ndërkohë, Hungaria duhet të ketë një ushtri të fortë dhe të promovojë paqen në të njëjtën kohë, tha ai. Vendi mund të mbrohet nëse qytetarët e tij e duan atdheun e tyre dhe janë të gatshëm ta mbrojnë atë në kohë telashe dhe të mos ikin prej tij, tha Orban.
“Të jemi për paqen nuk do të thotë që duhet të jemi të pafuqishëm”, tha ai. Argumenti i Hungarisë për paqen nuk vjen nga dobësia, theksoi kreu i qeverisë hungareze. Partitë e majta janë për luftë dhe “përderisa financohen nga jashtë”, kështu pritet të mbetet, sipas mendimit të kryeministrit hungarez. Lufta është gjithashtu një mjet për të "ristrukturuar pushtetin në Evropë", shtoi Orban.
Hakerët “hyjnë në televizionin rus” dhe thonë se ka pasur një sulm bërthamor
Një alarm i rremë ka futur në panik pjesë të Rusisë. “U krye një sulm bërthamor. Shkoni menjëherë në strehimore dhe merrni pilula jodi", ishte mesazhi i transmetuar nga TV dhe radio në disa Rajone.
Megjithatë, nuk kishte asgjë për t'u shqetësuar. Autoritetet bënë të ditur menjëherë se alarmi nuk ishte gjë tjetër veçse rezultat i një sulmi hakeri. Sipas Ukrinform, alarmi u përhap në Yekaterinburg dhe rajonin e Sverdlovsk.
Vetë Ministria e Situatave të Emergjencave të Rusisë konfirmoi se serverët e radios dhe televizionit ishin hakuar. Në fakt, pamjet e televizionit rus që transmeton mesazhin e alarmit po përhapen në internet. Ata që shikonin televizor panë një hartë të Rusisë duke u kthyer gradualisht në të kuqe nga perëndimi në lindje, ndërsa një zë thoshte:
“Kishte një sulm. Shkoni urgjentisht në një strehë”. Ekranet u ndezën gjithashtu me një shenjë paralajmëruese të rrezatimit të zi dhe të verdhë dhe një mesazh që thoshte: “Të gjithë të strehohen menjëherë”.
Sipas raportimeve, imazhet ndërprenë programet televizive dhe radiofonike në Moskë dhe rajonin e Sverdlovsk, duke përfshirë qytetin e katërt më të madh të vendit, Yekaterinburg. Ministria e Emergjencave të Rusisë tha: “Një alarm i rremë për sulm ajror u transmetua në Moskë pasi serverët e stacioneve radiofonike dhe kanaleve televizive u hakuan”.
Kujtojmë se që me fillimin e luftës në Ukrainë, presidenti rus Vladimir Putin ka kërcënuar se do të përdorë armët bërthamore nëse vihet në rrezik Rusia. Jo vetëm ai, por edhe shumë besnikë të liderit rus kanë bërë paralajmërime të frikshme për shpërthimin e një lufte atomike që do të vinte në rrezik të gjithë njerëzimin.
