Parlamenti i Suedisë ka miratuar zyrtarisht një projektligj që lejon vendin të anëtarësohet në NATO.
Ligjvënësit në Riksdagen me 349 vende votuan me shumicë dërrmuese – 296 pro dhe 37 vota kundër – për pranimin e Suedisë në NATO, me 43 anëtarë të munguar.
“Anëtarësimi në NATO është mënyra më e mirë për të mbrojtur sigurinë e Suedisë”, tha ministri i jashtëm Tobias Billström gjatë debatit gati shtatë-orësh.
Ai e quajti votimin një ngjarje “historike” dhe një nga vendimet më të rëndësishme të politikës së sigurisë ndonjëherë për vendin.
Suedia dhe fqinji i saj Finlanda aplikuan për t’u bashkuar me NATO-n në maj 2022, duke braktisur dekada të mos-angazhimit në vazhdën e pushtimit rus të Ukrainës.
Procesi është penguar nga Turqia, e cila së bashku me Hungarinë ende nuk i kanë ratifikuar anëtarësimet. Suedia në veçanti është përballur me kundërshtime nga Turqia, e cila thotë se Stokholmi strehon anëtarë të atyre që Turqia i konsideron grupe terroriste – një akuzë që Suedia e mohon, shkruan Guardian.
Presidenti i Turqisë, Recep Tayyip Erdoğan, tha javën e kaluar se qeveria e tij do të ecë përpara me ratifikimin e aplikimit të Finlandës, duke i hapur rrugën vendit për t’u bashkuar me aleancën përpara Suedisë. Erdogan tha se Suedia ende duhet të zgjidhë shqetësimet turke që kanë vonuar veprimin për aplikimin e përbashkët.
