Një prodhues global i komponentëve kryesore të teknologjisë së lartë për aplikime automobilistike dhe industriale do të investojë në objekte të reja prodhimi në qytetin Ruse, në Danub, tha Ministria e Ekonomisë në Bullgari.
GEBAUER & GRILLER GROUP ka selinë në Vjenë dhe do të furnizojë me produkte industrinë e automobilave bavareze.
Investimi i planifikuar arrin në rreth 60 milionë BGN (29 milionë euro). Vendet e punës që pritet të krijojë projekti do të arrijnë në rreth 400 me kalimin e kohës.
Detajet rreth projektit u diskutuan gjatë një takimi të ministrit të Ekonomisë, Bogdan Bogdanov me nënkryetarin e Gebauer & Griller Matthias Hornemann.
Në takim morën pjesë edhe nënkryetarja e komunës Ruse për ekonomi dhe bashkëpunim ndërkombëtar, Zllatomira Stefanova dhe përfaqësuesi tregtar i Bullgarisë në Bavari, Stefan Jonkov.
Ministri Bogdanov theksoi se industria e automobilave është një nga sektorët me rritje më të shpejtë në vend dhe është ndër prioritetet për tërheqjen e investimeve.
Ai vuri në dukje se më shumë se 90% e automjeteve të prodhuara në Evropë përdorin komponentë të prodhuar në Bullgari, me gjithnjë e më shumë kompani që e zhvendosin fokusin e tyre të prodhimit te automjetet elektrike.
Që në fillim, fabrika e re do të ketë një fokus të qartë në produktet për prodhuesit e mirënjohur evropianë të makinave. Kompania planifikon të prodhojë komponentë të teknologjisë së lartë për automjetet elektrike të prodhuara në Bavaria./BTA
