Presidenti rus Vladimir Putin tha në samitin e BRICS të mërkurën se Rusia dëshiron t'i japë fund luftës në Ukrainë, duke thënë se ajo ishte "shkaktuar nga Perëndimi dhe satelitët e tij". Në një fjalim me video drejtuar udhëheqësve të BRICS, të cilët nuk dënuan pushtimin rus të Ukrainës, Putin përsëriti se ai u detyrua në luftë nga veprimet e Kievit dhe Perëndimit.
Megjithatë Dmitry Medvedev, ish-presidenti i Rusisë dhe tani numri dy në Këshillin e Sigurimit, një nga super-skifterët e Vladimir Putin ka zbuluar qëllimet e vërteta të palës ruse. Dhe së fundmi ai la të kuptohet se duket e pamundur që së shpejti të nisin negociatat për luftën në Ukrainë.
“Ukraina do të zhduket si shtet si rezultat i këtij konflikti”, shkroi Medvedev në një editorial për shënimin e 15-vjetorit të pushtimit të Gjeorgjisë nga forcat e Moskës.
"Tashmë është e qartë se si do të përfundojë: Kievit do të duhet të përballet me një disfatë dërrmuese siç duhej të bënin atëherë gjeorgjianët. Shteti ukrainas i krijuar artificialisht mbi hirin e Bashkimit Sovjetik do të zhduket nga harta politike e botës", shpjegoi ish-presidenti. Jo vetëm kaq.
Medvedev tha se Moska u detyrua të nisë një operacion ushtarak kundër Ukrainës për të parandaluar agresionin nga perëndimi dhe autoritetet e Kievit. "Mënyra se si vepruan Perëndimi dhe marionetat e tij në Kiev në situatën e Donbasit është e njohur. Ishte e njëjta hipokrizi, të njëjtat hile dhe e njëjta axhendë e fshehur", shkroi Medvedev, duke krahasuar situatën me atë të 15 viteve më parë.
"Vetëm me forcë u shmang një rezultat fatal, sepse bisedimet kishin humbur sensin", shtoi Dmitry Medvedev.
