Sulmet masive ajrore ruse goditën infrastrukturën dhe objektivat civile anembanë Ukrainës gjatë natës duke shkaktuar dëme të shumta, por nuk raportohet për viktima.
Deri në 48 dronë sulmues u lëshuan nga rajonet e Rusisë Kursk dhe Primorsko-Akhtarsk në një valë sulmesh kundër qyteteve dhe rajoneve nga Lviv në perëndim deri në Odessa në jug dhe Kharkiv në verilindje, njoftuan Forcat Ajrore të Ukrainës në mediat sociale.
Operacionet e mbrojtjes ajrore të Ukrainës, duke përfshirë avionët luftarakë, njësitë e raketave anti-ajrore dhe grupet e lëvizshme të zjarrit në masë të madhe u rezistuan sulmeve, duke rrëzuar 24 prej dronëve së bashku me një raketë të drejtuar ajër-tokë të lëshuar nga sipër pjesës së pushtuar të rajonit Kharkiv.
Megjithatë, objektet kritike të infrastrukturës në rajonin e Lviv pësuan pesë goditje nga dronët, duke i vënë flakën të paktën njërit, sipas kreut të Administratës Ushtarake Rajonale të Lviv, Maksym Kozytskyi.
Komanda perëndimore e Forcave Ajrore të Ukrainës rrëzoi 11 nga dronët, por pesë arritën në objektivat e tyre, shkroi Kozytskyi në një postim në mediat sociale.
“Fatmirësisht nuk pati viktima apo të lënduar. Ka pasur një zjarr, por është shuar shpejt. Faleminderit luftëtarëve tanë të Mbrojtjes Ajrore, të cilët punuan shumë profesionalisht në kushte ekstreme kur dronët fluturonin në disa valë dhe shpesh ndryshonin drejtim”.
Duke folur të premten në mëngjes, presidenti Volodymyr Zelensky tha se Kharkivi, Zaporizhzhia, Khersoni, Mykolaivi, Odesa, Kievi, Kirovohradi, Vinnytsia dhe Khmelnytskyi ishin gjithashtu nën sulm.
