LIVE: Inteligjenca britanike zbulon skandalin e Putinit, del në skenë propozimi i parë konkret për t’i dhënë fund luftës

Sekretari i Mbrojtjes i Shteteve të Bashkuara, Lloyd Austin, ka mbërritur në Kiev të hënën në shenjë mbështetje për Ukrainën, pasi janë rritur shqetësimet se aleatët perëndimorë të Kievit janë “lodhur nga lufta”, posaçërisht SHBA-ja, e cila është përkrahësi i saj më i madh ushtarak dhe financiar.

“Sapo mbërrita në Kiev për t’u takuar me liderët ukrainas”, shkroi Austin në rrjetin social X.

“Jam këtu sot për ta dhënë një mesazh të rëndësishëm – Shtetet e Bashkuara do të vazhdojnë të qëndrojnë përkrah Ukrainës në luftën e saj për liri kundër agresionit të Rusisë, tani dhe në të ardhmen”, shtoi Austin.

Kjo është vizita e dytë e Austinit në Ukrainë, i cili udhëtoi me tren drejt Kievit nga Polonia.

Uashingtoni i ka dhuruar Ukrainës ndihma ushtarake dhe të tjera në vlerë dhjetëra miliarda dollarë prej se Rusia e nisi pushtimin e saj të paprovokuar në shkurt 2022.

Derisa Austini mbërriti në Kiev, një ushtar ukrainas dhe një grua u vranë nga shpërthimi i një granate në një banesë në rrethinën e Kievit, Dnipro, thanë autoritetet në kryeqytetin ukrainas. Një person tjetër u plagos dhe u dërgua në spital.

Shkaktari i shpërthimi nuk dihet, tha policia, duke shtuar se hetuesit janë në vendin e ngjarjes duke u marrë me rastin.

Në fillim të këtij muaji, Hennadiy Chastyakov, ndihmës i komandantit të Forcave të Armatosura të Ukrainës, Valery Zaluzhny, u vra nga shpërthimi i një granate që i ishte dhënë atij si dhuratë për ditëlindje.

Ndërkohë, dy civilë u vranë të hënën në mëngjes kur trupat ruse granatuan Hersonin, tha shefi i administratës ushtarake në qytetin jugor ukrainas, Roman Mrochko.

Qeveria amerikane e ka përsëritur shumë herë se do t’i qëndrojë pranë Kievit sa të jetë e nevojshme.

Megjithatë, së fundmi janë rritur shqetësimet nëse Uashingtoni do ta vazhdojë mbështetjen për Kievin, pasi republikanët në Kongres e kanë kundërshtuar një gjë të tillë.

Ndihmat shtesë për Ukrainën nuk u futën në projektligjin e përkohshëm financiar të aprovuar nga Kongresi javën e kaluar, i cili u bë për ta shmangur mbylljen e Qeverisë amerikane./rel

Lufta mes Rusisë dhe Ukrainës vazhdon e pandërprerë. Sidomos në qiejt e dy kryeqyteteve.

Gjatë natës të shtunën, forcat ruse të mbrojtjes ajrore zmbrapsën një sulm me dron kundër Moskës. Lajmi doli pas mesazhit në Telegram nga kryetari i bashkisë së kryeqytetit rus, Sergei Sobyanin: droni, saktësoi ai, u rrëzua teksa fluturonte mbi Bogorodsky, në pjesën lindore të rajonit të Moskës.

“Një tentativë për sulm me dron në Moskë u pengua sonte nga forcat e mbrojtjes ajrore në rrethin urban Bogorodsky. Nuk ka dëme apo viktima për shkak të rënies së mbeturinave. Shërbimet e urgjencës po punojnë në vend”, tha Sobyanin.

Ministria ruse e Mbrojtjes konfirmoi se forcat e saj shkatërruan një dron ukrainas që fluturonte mbi Bogorodsky.

Sulmet me dronë

Autoritetet ukrainase në vend të kësaj raportuan një valë sulmesh me drone ruse në Kiev për natën e dytë radhazi. “Për të dytën ditë radhazi, armiku sulmoi kryeqytetin me dronë.

Sipas të dhënave paraprake, municionet bombarduese të tipit Shahed janë përdorur sërish (të ashtuquajturit drone kamikaze)”, ishte përditësimi në Telegram nga Administrata Ushtarake e Kievit.

Kreu i administratës, Serhiy Popko, saktësoi se rreth një duzinë objektivash armike u goditën nga forcat dhe mjetet e mbrojtjes ajrore në territorin e Kievit dhe në periferi të qytetit.

Dronët e armikut sulmuan Kievin në valë dhe nga drejtime të ndryshme. Për këtë arsye janë shpallur disa herë alarme ajrore në kryeqytet. Nuk u dhanë informacione të mëtejshme për dëme apo viktima. Të shtunën, presidenti ukrainas Volodymyr Zelensky vlerësoi forcat e tij ajrore për rrëzimin e dronëve.

Ky ishte numri më i madh i dronëve të lëshuar nga Rusia në më shumë se gjashtë javë. Në fjalimin e tij, Presidenti u krenua, por gjithashtu ai paralajmëroi se me afrimin e dimrit, Rusia do të shtojë sulmet e saj ndaj infrastrukturës energjetike të Ukrainës.

Ukraina në delir

Sakaq, Ukraina duket se ka edhe një arsye tjetër, për tu mburrur. Ushtria tha dje se i kishte shtyrë rusët "3 deri në 8 kilometra" thellë në bregun e majtë të Dnieper të mbajtur nga Moska në shifrat e para për të vlerësuar përparimin pas disa muajsh të një kundërofensivë zhgënjyese.

“Të dhënat e para tregojnë një përparim prej 3 deri në 8 km, në varësi të specifikave të gjeografisë dhe topografisë së bregut të majtë”, tha zëdhënësja e ushtrisë ukrainase Natalia Gumenyuk për televizionin ukrainas.

Nëse ky informacion konfirmohet, do të jetë avancimi i parë i madh i ushtrisë ukrainase kundër pushtuesit rus në muajt e fundit.

Natalija Gumenyuk nuk tha, megjithatë, nëse forcat ukrainase kontrollojnë plotësisht atë zonë në rajonin Kherson, në jug të vendit, apo nëse ushtarët rusë thjesht u tërhoqën përballë sulmeve të Kievit. “Armiku vazhdon sulmet me artileri në bregun e djathtë”, tha ajo dhe vlerësoi se në atë zonë ndodhen “disa dhjetëra mijëra” ushtarë rusë.

“Kemi ende shumë punë për të bërë”, tha ajo.

Propozimi për fundin e luftës

Në këtë sfond disi gri, ka diçka premtuese: një propozim konkret për t’i dhënë fund luftës. Ish-sekretari i përgjithshëm i NATO-s Anders Fogh Rasmussen , i cili për vite ishte këshilltar me pagesë i politikanëve ukrainas, doli publikisht me një propozim për të cilin shumë vëzhgues po tundin kokën.

Duke qenë se fundi i luftës nuk është në dukje, Rasmusen thotë se Aleanca ende duhet t'i ofrojë Ukrainës anëtarësimin pa i kthyer Krimenë, Donbasin dhe territoret e tjera, të cilat u aneksuan ilegalisht nga presidenti rus Vladimir Putin.

Rasmussen argumenton se mbulimi i Ukrainës me Nenin 5, i cili u jep anëtarëve të NATO-s garanci kolektive të sigurisë, do ta pengonte Putinin nga përpjekjet për të kapur territor shtesë ukrainas.

Megjithatë, edhe për ata shtetarë që mbrojnë pranimin e Ukrainës në NATO, formula e Rasmussen është e papranueshme. Kjo nuk është hera e parë që shfaqet një ide e tillë.

Në një konferencë në gusht, Stian Jenssen, kreu i zyrës së Sekretarit të Përgjithshëm të NATO-s, Jens Stoltenberg, deklaroi se një rezultat i mundshëm mund të ishte që Ukraina të heqë dorë nga një pjesë e territorit të saj në këmbim të anëtarësimit në NATO.

Është zbuluar se Vladimir Putin po liron nga burgu vrasësit dhe përdhunuesit për të forcuar ushtrinë e tij të shkatërruar ruse. Sipas aktivistëve të të drejtave të njeriut, më shumë se 100,000 njerëz janë liruar nga burgjet ruse për të luftuar në Ukrainë, me disa të dënuar për disa nga krimet më brutale të vendit.

Putini po mbështetet gjithnjë e më shumë në taktikën, e cila ishte pioniere nga shefi i ndjerë i Grupit Wagner, Yevgeny PrigozhiN për të shmangur thirrjen e një mobilizimi tjetër të diskutueshëm përpara zgjedhjeve presidenciale të vitit të ardhshëm.

Një nga të liruarit ishte Vladislav Kanyus, një i ri që vrau ish të dashurën e tij Vera Pekhteleva, duke e torturuar, mbytur dhe goditur me thikë për orë të tëra.

Falja e Kanyus u bë kryefjalë në Rusi pasi nëna e Pekhteleva, Oksana, mori një foto të tij jashtë burgut dhe të rrethuar nga ushtarë të tjerë. Ajo tha për Washington Post: “Mendova se po çmendesha, vazhdoj të zmadhoj këtë foto dhe të shikoj fytyrën e tij me mosbesim”.

Por nuk mbaron me kaq.  Presidenti i dëshpëruar rus Putin po u ofron rekrutëve të rinj një milion rubla për t'u bashkuar me ushtrinë, pasi lufta e tij katastrofike në Ukrainë ka vrarë më shumë se 300,000 ushtarë rusë.

Burimet e inteligjencës në Britani besojnë se më shumë se një çerek milioni rusë janë vrarë në fushën e betejës që kur Kremlini urdhëroi sulmin ndaj Ukrainës fqinje në shkurt 2022.Tani një vijë e madhe fronti prej 600 miljesh ndan dy forcat pasi ukrainasit ngritën një mbrojtje të guximshme që i shtyu forcat ruse në lindje të vendit. Burimet e inteligjencës britanike vlerësuan gjithashtu se dhjetëra mijëra ushtarë rusë kanë dezertuar.

Autoritetet ruse ishin në gjendje të parandalonin kolapsin ekonomik që kërcënoi vendin pas futjes së sanksioneve të paprecedentë në vitin 2022.

Kështu u shpreh zëdhënësi i Kremlinit, Dmitry Peskov, shkruan Tass.

“Kishte një kërcënim për një kolaps, ne vërtet duhej të mobilizonim të gjitha burimet dhe forcat e brendshme për të parandaluar këtë kolaps”, tha përfaqësuesi i Kremlinit, duke vënë në dukje se ekonomia ruse u godit më pas nga barra e sanksioneve të paprecedentë.

“Asnjë vend në botë nuk është përballur ndonjëherë dhe teorikisht asnjë vend në botë nuk është në gjendje të përballojë një goditje të tillë,” tha Peskov.

Ai kujtoi se kjo ndodhi pas dy vitesh të pandemisë së COVID-it, që ishte edhe një goditje e madhe për ekonominë.

Presidenti rus, Vladimir Putin, do të marrë pjesë në samitin virtual të udhëheqësve të grupit të 20 shteteve më të industrializuara në botë (G20). Ky takim do të mbahet më 29 nëntor.

“Vladimir Putin do të marrë pjesë në samitin virtual të G20-s”, raportuan mediat ruse.

Putin nuk ka udhëtuar në dy takimet e fundit të G20 – në shtator në Indi dhe vitin e kaluar në Indonezi – duke dërguar në emër të tij ministrin e Jashtëm rus, Sergei Lavrov.

Putin ka realizuar vetëm disa udhëtime jashtë vendit, që kur Gjykata Ndërkombëtare Penale lëshoi urdhërarrestim për të lidhur me dëbimin e paligjshëm të fëmijëve ukrainas, përderisa pushtimi rus i Ukrainës po vazhdon.

G20 përbëhet nga 19 shtetet që kanë ekonomitë më të mëdha në botë dhe Bashkimi Evropian, e Unioni Afrikan.

Një bloger i hapur pro luftës, i cili ka kritikuar ashpër strategjinë ushtarake të Rusisë në Ukrainë, ka thënë se dëshiron të sfidojë Vladimir Putinin në zgjedhjet presidenciale të marsit të ardhshëm. Igor Girkin, 52 vjeç, udhëhoqi luftëtarët pro-rusë në Ukrainën lindore në 2014-ën, pas aneksimit nga Moska të Krimesë.

Girkin është në burg në pritje të gjykimit për ekstremizëm, të cilin ai e mohon. Ai tha se donte të prishte sondazhin “mashtrues” me fituesin tashmë të njohur. Ky koment shihet gjerësisht në Rusi si një referencë për presidentin Putin, i cili ende nuk ka deklaruar publikisht se do të kandidojë përsëri.

Në një letër drejtuar mbështetësve të publikuar në Telegram të dielën, Girkin, tha: “Unë e kuptoj shumë mirë se në situatën aktuale në Rusi, pjesëmarrja në fushatën presidenciale është si të ulesh në një tryezë për të luajtur me karta të mprehta.”

Po shtoi se shpresonte se përpjekja e tij për të bashkuar forcat patriotike do të prishte planet e Kremlinit për zgjedhjet në të cilat “i vetmi fitues dihet paraprakisht”. “Ky është shansi ynë për t’u bashkuar përballë kërcënimeve të jashtme dhe të brendshme,” tha ai.

52 vjeçari u tha mbështetësve të tij që të krijonin një seli për fushatën e tij dhe të fillonin mbledhjen e nënshkrimeve për kandidaturën e tij, edhe pse e dinte se nuk do të lejohej të dilte.

Të paktën 100 individë u sanksionuan nga Këshilli i Sigurisë Kombëtare dhe Mbrojtjes së Ukrainës për përfshirjen e tyre në rrëmbimin dhe deportimin e paligjshëm të fëmijëve ukrainas. Në listën e sanksioneve u përfshinë gjithashtu 40 persona juridikë rusë, sipas asaj që raportuan mediat ukrainase.

Organizata e qeverisë ukrainase Fëmijët e Luftës vlerëson se të paktën 19,546 fëmijë ukrainas janë rrëmbyer dhe marrë me forcë, megjithëse numri aktual ka të ngjarë shumë më i lartë.

53 vjeçarja Svitlana Maiboroda është një ish-zyrtare ukrainase, e cila filloi të bashkëpunojë me autoritetet ruse pasi forcat ruse pushtuan rajonin e Donetsk në vitin 2014. Ajo aktualisht punon si drejtuese e të gjitha shërbimeve sociale për familjet dhe fëmijët në pjesët e pushtuara nga Rusia.

Një film dokumentar i Kyiv Independent zbuloi se si zyrtarët si Maiboroda i penguan fëmijët në rajonin e Donetskut të pushtuar nga Rusia të ribashkoheshin me kujdestarët e tyre ligjorë dhe u dërguan në Rusi kundër vullnetit të tyre. Kyiv Independent mori një listë me 31 fëmijë ukrainas që u deportuan si grup.