Ukraina ka bërë thirrje për një takim urgjent të Këshillit të Sigurimit të Kombeve të Bashkuara pas sulmit më të madh ajror të Rusisë ndaj vendit që nga fillimi i pushtimit të saj në shkallë të plotë.
Ministri i Jashtëm ukrainas, Dmytro Kuleba shkroi në platformën X:
“Ukraina, së bashku me tre duzina shtete anëtare të OKB-së, kërkuan që Presidenca ekuadoriane të thërrasë një takim urgjent të KS të OKB-së për të adresuar sulmin me raketa dhe dron të Rusisë kundër Ukrainës, i cili rezultoi në viktima të shumta civile dhe shkatërrim të rëndë të infrastrukturës civile,” shkroi Kuleba.
Presidenca e Këshillit të Sigurimit të OKB-së vendoset në baza mujore dhe Ekuadori mban përgjegjësinë për dhjetorin.
