Në kuadër të punës së tij aktive për mbrojtjen dhe popullarizimin e Brezit të Gjelbër Evropian - trashëgimia e përbashkët natyrore përgjatë vijës së ish-Perdes së Hekurt, Fondacioni Bullgar i Biodiversitetit nis një projekt të ri.
“BALKANIA ROUTE: Dy hapa drejt të tjerëve” synon të lidhë infrastrukturën ekzistuese të gjelbër përgjatë pjesës ballkanike të Brezit të Gjelbër Evropian duke krijuar një koncept për turizmin e ecjes në distanca të gjata, tha organizata mjedisore në faqen e saj të internetit.
Rruga e re turistike do të mbulojë 3.500 km dhe do të përfshijë nëntë vende të Ballkanit: Kosovën, Shqipërinë, Bullgarinë, Serbinë, Rumaninë, Malin e Zi, Maqedoninë e Veriut, Greqinë dhe Turqinë. Qëllimi është popullarizimi - dhe në këtë mënyrë t'i bëjë njerëzit të mbrojnë - territoret e egra dhe speciet e vlefshme bimore dhe shtazore përgjatë Brezit të Gjelbër Ballkanik.
Si pjesë e projektit, Fondacioni Bullgar i Biodiversitetit planifikon të punojë me partnerë nga Shqipëria, Serbia, Maqedonia e Veriut dhe Turqia. Projekti ndërkufitar ka fituar 59 mijë e 982 euro në financim në kuadrin e thirrjes së dytë BESTbelt për projekt propozime. Projekti do të vazhdojë deri në fund të vitit 2024.
Në një intervistë për bTV, Petar Vanev nga Fondacioni Bullgar i Biodiversitetit shpjegoi se OJQ-ja do të përgatisë harta GPS dhe informacione rreth burimeve të ujit, objekteve të akomodimit dhe kalimeve kufitare përgjatë rrugës. Në Bullgari, itinerari do të përfshijë malet e Ballkanit Perëndimor, Belasitsa, Slavyanka, Rodope, Sakar dhe malet Stranzha.
