LIVE: Lavrov i ‘zemëruar’ thotë se amerikanët po kalojnë kufirin - BE do të rrisë mbështetjen ushtarake për Ukrainën

Ministri i Jashtëm rus Sergei Lavrov, i pyetur për dërgesat e mundshme të raketave me rreze të gjatë veprimi amerikane në Ukrainë, paralajmëroi sot Shtetet e Bashkuara të mos shkelin “vijat e kuqe” të Rusisë.

Lavrov tha se Uashingtoni po shkel kufirin me Rusinë dhe kjo është e rrezikshme.

“Nuk do të habitem nga asgjë. Amerikanët tashmë e kanë tejkaluar kufirin që i kanë vendosur vetes.

 Zelensky, natyrisht, e sheh këtë dhe përfiton prej saj. Ata nuk duhet të shkelin vijat tona të kuqe. Ata e dinë shumë mirë se ku janë”, tha ministri rus.

“Obsesioni me luftën për pushtet, në mënyrë që demokratët të tregojnë se janë më të ashpër se republikanët ose anasjelltas, të paktën tani për tani, po çon në përshkallëzim gjithnjë e më shumë.

Jam i bindur se aty ka njerëz të arsyeshëm që kanë njëfarë ndikimi. Shpresoj se do të merren parasysh interesat e Shteteve të Bashkuara”, shtoi Lavrov.

BE-ja i shprehu ngushëllimet e saj Ukrainës në lidhje me tragjedinë në Poltava, ku më shumë se 50 njerëz vdiqën dhe qindra u plagosën si rezultat i një sulmi raketor rus, dhe njoftoi synimin e saj për të rritur dhënien e mbështetjes ushtarake për Ukrainën.

Deklarata e zëdhënësit të BE-së është publikuar në faqen e Shërbimit Diplomatik të Bashkimit Evropian, transmeton Ukrinform.

"Është një tjetër gjakderdhje e synuar që dëshmon vendosmërinë e Rusisë për të vazhduar luftën e saj brutale kundër Ukrainës dhe popullit të saj, duke u përpjekur të shkaktojë humbjen më të madhe të mundshme të jetëve dhe të shkaktojë shkatërrime në shkallë të gjerë. Ne ndajmë dhimbjen e familjeve të viktimave dhe qëndrojmë pranë popullit ukrainas”, thuhet në deklaratë.

Zëdhënësi i BE-së vuri në dukje se gjatë dy viteve e gjysmë të fundit, Rusia ka terrorizuar vazhdimisht popullsinë e Ukrainës duke zhvilluar luftën e saj të paligjshme të agresionit, me sulme pa dallim me raketa dhe dron në të gjithë territorin e Ukrainës, duke synuar në mënyrë frikacake kryesisht objektivat civile.

"Kjo vetëm nënvizon nevojën që Ukraina, në përputhje me të drejtën e saj legjitime për vetëmbrojtje sipas Kartës së OKB-së, të jetë në gjendje të shmangë efektivisht sulme të tilla të tmerrshme të nisura nga platformat ushtarake në Rusi dhe të shtyjë agresorin prapa. Bashkimi Evropian mbetet i përkushtuar për të rritur shpërndarjen e mbështetjes ushtarake, duke përfshirë sistemet e mbrojtjes ajrore dhe municionin, këto dërgesa forcojnë vetëmbrojtje të Ukrainës, shpëtojnë jetë të pafajshmëve dhe ulin nivelin e shkatërrimit në Ukrainë", tha zëdhënësi i BE-së.

Siç raportoi Ukrinform, më 3 shtator, rusët goditën një institucion arsimor dhe një spital në Poltava me dy raketa balistike. Si rezultat i sulmit, 51 persona vdiqën dhe më shumë se 200 u plagosën.

Ministri i Jashtëm Dmytro Kuleba, një nga personalitetet më të njohura të Ukrainës në skenën ndërkombëtare, dorëzoi dorëheqjen e tij të mërkurën, në prag të një riorganizimi të madh të pritshëm të qeverisë ukrainase. Sulmet ruse, ndërkohë, vranë të paktën shtatë persona në qytetin ukrainas Lviv pranë kufirit polak, një ditë pas njërit prej sulmeve më vdekjeprurëse me raketa, që nga fillimi i luftës.

Dmytro Kuleba, 43 vjeç, nuk dha arsye për dorëheqjen, e cila do të diskutohet nga ligjvënësit në seancën e ardhshme, tha kryetari i parlamentit Ruslan Stefanchuk në llogarinë e tij në Facebook. Katër ministra të tjerë të kabinetit dhanë dorëheqjet e tyre të martën vonë, duke e bërë riorganizimin e kabinetit me gjasë më të madhin që nga agresioni i Rusisë në shkurt të vitit 2022.

Presidenti ukrainas Volodymyr Zelensky la të kuptohet javën e kaluar se një riorganizim ishte i pashmangshëm, ndërsa lufta pritet të hyjë në një periudhë kritike.

Presidentit Zelensky i duhet të mbajë moralin e Ukrainës në mes të luftës së ashpër me fqinjin e saj më të madh dhe vendosmërinë e vendit për atë që pritet të jetë një tjetër dimër i vështirë. Rusia ka shkatërruar rrjetin elektrik të Ukrainës, duke rrënuar rreth 70 për qind të kapacitetit prodhues dhe duke ndërprerë furnizimin me ngrohje dhe ujë.

Operacioni i rrezikshëm, por kryesisht i suksesshëm i ushtrisë ukrainase pothuajse një muaj më parë në rajonin kufitar të Kurskut të Rusisë, sikur ndryshoi rrjedhën e muajve të tërë me lajme të zymta nga vija e frontit në Ukrainën lindore.

Kursku nuk është një përparësi, megjithatë, për Presidentin rus Vladimir Putin, i cili mbetet i vendosur të shtyjë ushtrinë e tij më thellë në Ukrainën lindore. Sulmi i Rusisë në Donetsk, ku Ukraina ka mungesë të trupave dhe mbrojtjes ajrore, dhe sulmet me raketa me rreze të gjatë që godasin vazhdimisht zonat civile të Ukrainës, sinjalizojnë se Presidenti Putin do të mbetet i pakompromis dhe i paepur në përpjekjet e tij për të shtypur rezistencën ukrainase.

Presidenti Zelensky gjithashtu ka parasysh zgjedhjet presidenciale në SHBA në nëntor, të cilat mund të sjellin një ndryshim në mbështetjen kryesore ushtarake amerikane për vendin e tij.

Gjatë luftës, ministri Kuleba ka qenë i dyti pas Presidentit Zelensky në transmetimin e mesazhit dhe nevojave të Ukrainës për një audiencë ndërkombëtare, qoftë përmes postimeve në mediat sociale apo takimeve me personalitete të huaja. Në korrik, zoti Kuleba u bë zyrtari më i lartë ukrainas që vizitoi Kinën që nga agresioni rus. Ai është ministër i Jashtëm që nga marsi i vitit 2020.

Pasardhësi i zotit Kuleba nuk dihet ende, por pritet të shpallet të enjten. Disa media ukrainase, duke cituar burime të paidentifikuara, thanë se zëvendësi i tij, Andrii Sybiha, do të mund të bëhej kryediplomati i vendit.

Ministri i ri i Jashtëm ka të ngjarë të shoqërojë Presidentin Zelensky në Asamblenë e Përgjithshme të Kombeve të Bashkuara në Nju Jork javën e ardhshme, e cila është një mundësi për të kërkuar mbështetjen e udhëheqësve botëror.

Më shumë se gjysma e kabinetit aktual do të pësojë ndryshime, tha Davyd Arakhamiia, një udhëheqës i partisë së zotit Zelensky në parlamentin ukrainas. Ministrat do të japin dorëheqjen të mërkurën dhe emërimet e reja do të bëhen të enjten, tha ai.

Mandati pesëvjeçar i Presidentit Zelensky përfundoi në muajin maj. Ai mbetet në pushtet sipas dispozitave të ligjit ushtarak.

Sulmet ruse, ndërkohë, vranë të paktën shtatë persona dhe plagosën 35 të tjerë në një sulm gjatë natës në Lviv, tha kryebashkiaku Andrii Sadovyi. Një fëmijë dhe një punonjës mjekësor ishin në mesin e të vrarëve dhe shumë nga të plagosurit janë në gjendje të rëndë, tha ai.

Lvivi shtrihet rreth 60 kilometra nga kufiri me Poloninë, një vend anëtar i NATO-s dhe Bashkimit Evropian dhe një nga mbështetësit më të zëshëm të Ukrainës.

Një sulm gjatë natës plagosi gjithashtu pesë persona në Kryvyi Rih, vendlindja e zotit Zelensky, tha shefi rajonal Serhii Lysak.

Zoti Kuleba tha se sulmet flasin për nevojën e Ukrainës për më shumë mbështetje perëndimore. "Për t'i dhënë fund këtij terrori, partnerët e Ukrainës duhet të dorëzojnë menjëherë sistemet dhe municionet e premtuara të mbrojtjes ajrore, si dhe të forcojnë aftësitë mbrojtëse të Ukrainës dhe të na lejojnë të kryejmë sulme me rreze të gjatë mbi të gjitha objektivat legjitime ushtarake në Rusi", shkroi ai në rrjetin X.

Presidenti Zelensky reagoi ndaj sulmeve duke u kërkuar aleatëve të Ukrainës që t'i japin Kievit leje për të përdorur armët perëndimore, për të goditur më thellë në territorin rus.

Sulmi ndodhi një ditë pasi dy raketa balistike shpërthyen në një akademi ushtarake dhe një spital aty pranë në Poltava, duke vrarë mbi 50 persona dhe duke plagosur pothuajse 300 të tjerë, thanë zyrtarët ukrainas.

Poltava, një qytet rreth 350 kilometra në juglindje të Kievit, shtrihet përgjatë autostradës kryesore dhe hekurudhës midis Kievit dhe qytetit të dytë më të madh të Ukrainës, Kharkiv, i cili është afër kufirit rus./VOA

Norvegjia do të dhurojë 570 milionë korona norvegjeze (48.28 milionë euro) për Fondin Ndërkombëtar për Ukrainën. Fondet do të përdoren për blerjen e dronëve dhe sistemeve të mbrojtjes ajrore për ushtarët ukrainas, sipas shërbimit për shtyp të qeverisë norvegjeze, raporton RBC Ukraine.

Ukraina do të marrë dronë shtesë për të ndihmuar në luftën kundër forcave ruse, si dhe më shumë sisteme të mbrojtjes ajrore për të mbrojtur popullsinë ukrainase dhe infrastrukturën kritike nga sulmet ruse.

“Ukraina ka një nevojë urgjente për më shumë pajisje ushtarake për t’u mbrojtur kundër luftës ruse të agresionit. Së bashku me vendet e tjera, Norvegjia do të bëjë gjithçka që mundemi për të kontribuar,” tha Bjørn Arild Gram.

Në total, që nga fillimi i luftës në shkallë të gjerë në Ukrainë, Norvegjia ka kontribuar me 1.8 miliardë korona norvegjeze (rreth 160 milionë euro). Qëllimi i fondit është blerja e armëve nga industria për transferim të mëtejshëm në Ukrainë.

Presidenti i Ukrainës, Volodymyr Zelensky të martën tha se një sulm rus ka vrarë të paktën 51 persona dhe ka plagosur 271 në një rajon qendror të vendit.

Dy raketa balistike ruse goditën një objekt arsimor dhe një spital aty pranë në një rajon qendror të Ukrainës, raportoi AP.

Sulmi ndodhi në rajonin e Poltava, tha Zelensky në një video të postuar në kanalin e tij Telegram.

Poltava ndodhet rreth 110 kilometra (70 milje) nga kufiri me Rusinë dhe rreth 350 kilometra (200 milje) në juglindje të Kievit.

Sulmi dukej të ishte një nga më vdekjeprurësit e kryer nga forcat ruse që nga fillimi i luftës më shumë se 900 ditë më parë, më 24 shkurt 2022.

“Një nga godinat e Institutit të Komunikimeve është shkatërruar pjesërisht. Njerëzit u gjendën nën rrënoja. Shumë u shpëtuan”, tha Zelensky në një video të postuar në kanalin e tij Telegram.

“Të gjitha shërbimet e nevojshme janë të përfshira në operacionin e shpëtimit,” shtoi ai. Ai tha se kishte urdhëruar “një hetim të plotë dhe të shpejtë” për atë që ndodhi. Zelensky nuk dha detaje të mëtejshme.

Raketat goditën menjëherë pasi u dëgjua alarmi për sulmin ajror, kur shumë njerëz po shkonin për në një strehë për bomba, tha Ministria e Mbrojtjes e Ukrainës, duke e përshkruar sulmin si “barbar”, thuhet në raport.

Ekuipazhet e shpëtimit dhe mjekët shpëtuan 25 njerëz, 11 prej të cilëve u nxorën nga rrënojat, thuhet në një deklaratë të Ministrisë së Mbrojtjes.

Rusia ka nisur një tjetër sulm ndaj Ukrainës, kanë thënë zyrtarët, më pak se një ditë pasi sulmi i saj vdekjeprurës me raketa balistike vrau më shumë se 50 njerëz në Poltava.

Administrata rajonale e rajonit verilindor Sumy tha se forcat ruse filluan një sulm ajror në qytetin Sumy sonte, duke goditur një nga ndërtesat e universitetit të tij.

Nuk kishte detaje për viktima, shkruan Sky News.

“Të gjitha shërbimet e nevojshme janë të disponueshme në vend,” tha administrata në një postim për Telegram.