Gjermania do të vendosë përkohësisht kontrolle më të forta në të gjithë kufijtë e saj tokësorë për të reduktuar migrimin e parregullt dhe për të përmirësuar sigurinë.
Ministrja e Brendshme gjermane Nancy Faeser njoftoi në një konferencë për shtyp sot, se kontrollet e reja do të jenë në fuqi për gjashtë muaj, duke filluar nga data 16 shtator.
“Ne duam të reduktojmë më tej migrimin e parregullt. Për këtë qëllim, ne tani po ndërmarrim hapa të mëtejshëm që shkojnë përtej masave gjithëpërfshirëse dhe të vazhdueshme. Numri i refuzimeve do të rritet vetëm si rezultat i kësaj mase,” tha ajo.
Gjermania ndan kufijtë me Poloninë, Austrinë, Francën, Danimarkën, Republikën Çeke, Zvicrën, Belgjikën, Luksemburgun dhe Holandën.
Zakonisht, udhëtimi midis vendeve, të cilat janë të gjitha pjesë e zonës Shengen, është pa probleme. Megjithatë, kontrollet e reja nënkuptojnë se policia gjermane do të kryejë kontrolle për njerëzit që kërkojnë të kalojnë.
Gjermania u përball me një rritje të migrimit të parregullt vitin e kaluar, me mbi 250 mijë njerëz të dyshuar për hyrje të paligjshme në vend, sipas autoriteteve.
