LIVE: Dalin pamjet nga aksioni i ukrainasve në qytetin rus Belgorod – raketat bien kudo

Ukrainasit po vazhdojnë me sukses inkursionin brenda territorit rus, ku po zhvillohen luftime të ashpra në rajonin e Kurskut.

E një video e re shfaq momentin kur raketat ukrainase bien në qytetin tjetër rus – atë të Belgorodit.

Pamjet nga ajri tregojnë raketat që godasin pjesë të ndryshme të qytetit rus, ku hidhen në erë vetura e objekte të ndryshme ushtarake.

Në anën tjetër nga Kievi, pretendojnë se kanë arritur të futin nën kontroll edhe disa fshatra tjera të rajonin të Kurskut.

Ndërkaq rusët kanë filluar të përforcojnë vijën mbrojtëse përgjatë kufirit Rusi-Ukrainë, nga frika se inkursioni do të zgjerohet.

Dy persona kanë vdekur në një sulm me raketa në qytetin port ukrainas të Detit të Zi, Odesa, thanë zyrtarët lokalë, ndërsa Moska dhe Kievi shkëmbyen sulme me dronë dhe raketa.

Forcat Ajrore të Ukrainës njoftuan se kanë rrëzuar 10 nga 14 dronët dhe një nga tre raketat që Rusia ka lëshuar.

Ndërkohë, të paktën 41 persona u plagosën kur një bombë ajrore ruse goditi një ndërtesë banimi shumëkatëshe në Kharkiv, tha kryebashkiaku Ihor Terekhov, duke shtuar se bomba e drejtuar goditi katin e 10-të të ndërtesës, me zjarrin që u përhap në katër kate.

Dymbëdhjetë ndërtesa të tjera u dëmtuan gjithashtu, tha ai.

Siç raportohet, Ukraina dhe Rusia kryejnë rregullisht sulme me dronë gjatë natës në territorin e njëri-tjetrit, shkruan AP.

Sulmet e fundit vijnë pasi Ukraina bëri një thirrje të re ndaj Perëndimit për ta lejuar atë të përdorë raketat me rreze të gjatë veprimi që ata kanë ofruar për të goditur objektivat thellë brenda Rusisë.

Deri më tani, SHBA-ja e ka lejuar Kievin të përdorë armë të siguruara nga Amerika vetëm në një zonë të kufizuar brenda kufirit të Rusisë me Ukrainën.

Zyrtarët e Kievit argumentojnë se armët janë jetike për të dobësuar aftësinë e Rusisë për të goditur Ukrainën. 

Ministria e Mbrojtjes e Mbretërisë së Bashkuar (MM) ka përshkruar betejat me të cilat po përballet Ukraina në zona të shumta të vijës së frontit.

Në një përditësim më herët gjatë ditës së sotme, ai tha se trupat ruse po vazhdojnë operacionet sulmuese “me ritëm të lartë”, shkruan skynews.

“Në rajonin e Kurskut të Rusisë, ku Ukraina ka mbajtur kontrollin e rreth 800-900 kilometra katrorë të territorit që nga mesi i gushtit të vitit 2024, forcat ruse kanë filluar një kundërofensivë”, thuhet në deklaratë.

“Forcat ruse kanë sulmuar pozicionet ukrainase në perëndim të zonës së spikatur dhe kanë shumë gjasa të rimarrin disa fshatra”, shtoi ai.

Ky përditësim vjen pasi forcat ruse pretenduan gjatë fundjavës se kishin marrë kontrollin e fshatrave Zhelanne Pershe dhe Dolynivka në rajonin lindor të Ukrainës Donetsk.

“Në Ukrainën lindore, forcat ruse kanë bërë përparime graduale rreth Vuhledar dhe në juglindje të qendrës logjistike të Pokrovsk”, vazhdoi Ministria britanike.

Në Telangana të Indisë, një person po bën përpjekje të dëshpëruara për të kthyer vëllanë e tij nga fronti i forcave ruse në Ukrainë, pasi ai u mashtrua të punojë për Rusinë gjatë sulmit në këtë vend fqinj. Siç njofton korrespondenti i Zërit të Amerikës, Henry Wilkins, ekspertët thonë se hile të tilla përdoren vërtet nga Rusia, ndërsa shpjegojnë se përse ajo i mashtron shtetasit e huaj që të marrin pjesë në këtë luftë.

Salman Zahur Sayyed thotë se vëllanë e tij e mashtruan që të punojë në vijën e frontit për Rusinë gjatë sulmit në Ukrainë.

Ai shkoi në Rusi pasi iu premtua se do të punojë për qeverinë, me një pagë rreth dy mijë dollarë në muaj dhe mundësinë për të marrë shtetësinë ruse. Kur mbërriti, ai nënshkroi një kontratë. Pastaj, gjërat filluan të përkeqësohen.

“Kur vëllai im dhe të tjerë kuptuan se çfarë po ndodhte, u thanë se do t’u duhet të luftojnë sa herë që i nevojiten ushtrisë, pasi tashmë i kishin firmosur dokumentet”, tregon zoti Sayyed.

Ai thotë se kontrata ishte në rusisht dhe se vëllai i tij nuk kishte se si ta kuptonte.

Megjithëse vëllai i tij është pjesë e forcave mbështetëse dhe jo pjesë e njësive luftarake, ai ka qenë në front pranë Khersonit dhe vetëm dy muaj më parë pa se si njëzetë indianë, nepalezë dhe rusë u vranë nga një sulm me dronë ukrainas.

Sipas analistëve, qindra njerëz nga vende si India, Nepali dhe Kuba janë mashtruar për t’u bërë pjesë e forcave ruse në Ukrainë. Ata thonë se evidenca tregon se Rusia po e shton këtë praktikë.

“Ndonjëherë këto metoda i ngjasojnë trafikimit të qenieve njerëzore, pasi rusët përqëndrohen tek personat që duan të largohen nga vendi i tyre. Indianët dëshirojnë të gjejnë mundësi për t’u larguar nga India dhe ata në thelb i joshën. I mashtruan”, thotë Milosz Bartosiewicz, nga Qendra për Studime Lindore.

Një tjetër eksperte i tha Zërit të Amerikës se është e zakonshme që vendet ndërluftuese të rekrutojnë shtetas të huaj, por se sipas analizës së saj historike të dy shekujve të fundit, mashtrimi i rekrutëve që të punojnë në zona lufte është përdorur shumë rrallë në të kaluarën.

“Arsyeja përse nuk bëhet kjo është sepse ka kosto të thella politike. Merr kështu ushtarë aspak të mirë, që nuk kanë asnjë dëshirë për të luftuar, pasi nuk kanë ardhur aty për të luftuar. Pra nuk ka ndonjë përfitim domethënës. Ky është një fenomen i rrallë dhe na tregon se sa beson Putini se mund të përballojë ushtria ruse në Ukrainë dhe se çfarë i nevojitet për të fituar – pra se sa i madh është ky hendek”, thotë Elizabeth M.F. Grasmeder, nga Universiteti Duke.

Zoti Sayyed thotë se vëllai i tij as nuk e di nëse po paguhet.

“Nuk kanë patur mundësi të kontrollojnë nëse kanë marrë ndonjë pagesë në bankë, pasi gjenden larg civilizimit nëpër pyje. Agjentët mund t’i kenë mashtruar duke u dhënë edhe të dhëna jo të sakta bankare”, thotë ai.

Zoti Sayyed thotë se mënyra e vetme për t’u lidhur me të vëllanë është kur ndonjë ushtar rus i lë telefonin e tij për të folur./VOA