Kryetari i një qyteti polak u ka kërkuar banorëve që të evakuohen, pasi përmbytjet e përhapura kanë përfshirë Evropën Qendrore.
Kryebashkiaku i Nysa-s, Kordian Kolbiarz u kërkoi njerëzve të drejtoheshin për në tokë më të lartë, duke përmendur rrezikun e një depërtimi të argjinaturës dhe lëshimit të një kaskade uji në qytet nga një liqen aty pranë.
Të hënën, numri i të vdekurve nga përmbytjet që goditën Evropën Qendrore gjatë fundjavës vazhdoi të rritet, me më shumë viktima të regjistruara në Republikën Çeke, Poloni dhe Austri.
Budapesti tha se do të mbyllë rrugët pranë lumit Danub që kalon nëpër qytet, duke përmendur rrezikun e përmbytjeve më vonë këtë javë.
“Ju lutemi largoni gjërat tuaja, veten, të dashurit tuaj. Ia vlen të shkosh menjëherë në katin e fundit të ndërtesës, sepse dallga mund të jetë disa metra e lartë. Kjo do të thotë se i gjithë qyteti do të përmbytet”, shkroi Kolbiarz, kryebashkiaku i Nysa.
Kryeministri polak Donald Tusk tha se një miliard zloty (mbi 200 milionë euro) do të ndahen për viktimat e përmbytjeve. Ai shtoi se Polonia do të aplikojë gjithashtu për fondet e ndihmës së BE-së.
Të hënën, vendi shpalli gjendjen e fatkeqësisë natyrore, duke e bërë më të lehtë përgjigjen e emergjencës dhe duke çliruar fondet e BE-së.
Numri i të vdekurve nga përmbytjet e vazhdueshme në Evropën Qendrore arriti në 16 të hënën, me më shumë vdekje të regjistruara në Republikën Çeke, Poloni dhe Austri.
Edhe pse kushtet janë stabilizuar në disa vende, të tjera po përgatiten për më shumë përçarje dhe rrezik.
Në Sllovaki, vërshimi i lumit Danub shkaktoi përmbytje në zonën e qytetit të vjetër të kryeqytetit, Bratislavë, me mediat lokale që raportuan se nivelet e ujit kaluan 9 metra dhe pritej të rriteshin më tej.
Hungaria po përgatitet për përmbytjet në ditët në vijim. Paralajmërimet janë në fuqi përgjatë 500 kilometra të Danubit.
Lumi po rritet me rreth një metër çdo 24 orë, me kryebashkiakun e Budapestit që u ofron banorëve një milion thasë me rërë për t’u mbrojtur nga ujërat e përmbytjeve.
