Gjermania thotë se Moldavia mund të jetë e radhës nëse Ukraina bie
Mbështetja për Ukrainën garanton mbijetesën e Moldavisë fqinje.
Kështu ka thënë të martën Ministrja e Jashtme gjermane Annalena Baerbock në një konferencë për të adresuar shqetësimet rreth zgjerimit të ndërhyrjes ruse në rajon.
“Gjithçka që bëjmë për të mbështetur Ukrainën do të thotë gjithashtu nxitje e stabilizimit në lidhje me Moldavinë”, citohet të ketë thënë Baerbock, shkruajnë mediat e huaja, përcjell Telegrafi.
“Është e qartë se cili është shqetësimi më i madh i njerëzve këtu: që nëse Ukraina bie, Moldavia është vendi i radhës”.
Baerbock ishte duke vizituar Kishinau për Platformën e Partneritetit të Moldavisë, së bashku me aleatët nga Franca dhe Rumania.
Gjermania, një nga mbështetësit kryesorë ushtarakë të Kievit në Evropë, e inicioi platformën pasi Rusia pushtoi Ukrainën në vitin 2022, duke e pasqyruar atë si pjesë të përpjekjeve më të gjera për të stabilizuar ekonominë e Moldavisë dhe për ta mbrojtur atë nga dezinformatat ruse.
E presidentja moldave Maia Sandu tha se vendi ende përballet me sfida serioze dhe u kërkoi partnerëve të rrisin mbështetjen e tyre.
“Lufta e Rusisë kundër Ukrainës, të cilën ne e dënuam që në ditën e parë, ka shkaktuar dëme të mëdha në ekonominë tonë”, tha Sandu.
“Pasiguria e shkaktuar nga lufta vazhdon të pengojë seriozisht zhvillimin tonë ekonomik dhe do të vazhdojë ta pengojë atë për aq kohë sa të zgjasë lufta”, shtoi ajo.
Ukraina prezanton tanket e saj të përmirësuara Leopard 1
Brigada e 5-të e ushtrisë ukrainase ka prezantuar për opinionin për herë të parë tankun e përmirësuar Leopard 1A5V, duke bërë kështu edhe demonstrimin e parë publik të këtij mjeti të modernizuar.
Që nga fillimi i luftës që e nisi Rusia në shkurt të vitit 2022, Ukraina ka marrë afro 200 tanke të prodhuara në të 80-at të tipit Leopard 1A5 MBT përmes konsorciumit gjermano-danez.
Ata përbënin deri më tani pjesën më të madhe të marrjes së tankeve të stilit perëndimor nga Ukraina, të numëruara më shumë se T-64 dhe T-72 që Ukraina ose i trashëgoi nga Bashkimi Sovjetik ose të siguruara nga ish-aleatët evropianë të Paktit të Varshavës.
Pavarësisht numrit të madh të tankeve të ofruara, dizajni 50-vjeçar u dëshmua veçanërisht i prekshëm ndaj armëve moderne dhe dronëve.
Ai ka gjithashtu pikat e tij të forta, jo vetëm shpejtësinë dhe armatimin kryesor me topin 105 mm L7 të projektuar shumë saktë.
Tanket mund të arrijnë shpejtësi deri në 70 km/h dhe mund të japin goditje të sakta në rreze deri në 4 kilometra.
Përmirësimet ukrainase kanë bërë një rrugë të gjatë drejt tejkalimit të dobësive ekzistuese për të prodhuar një tank që mund të krahasohet me MBT më të mirë, që Kievi ka në dispozicion.
Këta Leopardë janë pajisur me shufra të blinduara shtesë dhe ekrane mbrojtëse, për t’iu kundërvënë armëve moderne antitank dhe dronëve rusë që pushtojnë fushëbetejën ukrainase.
Britania e Madhe: Rusia ka humbur 610 mijë ushtarë
Rusia ka të ngjarë të ketë humbur më shumë se 610 mijë ushtarë që nga fillimi i luftës në Ukrainë – të vrarë dhe të plagosur – tha Ministria e Mbrojtjes e Mbretërisë së Bashkuar.
Taktikat e bazuara në “valët e masave të këmbësorisë” kanë kërkuar që Moska të “riformojë vazhdimisht forcat në front me një fluks të qëndrueshëm rekrutësh të rinj”, shtoi ministria.
Ka të ngjarë që normat e rekrutimit këtë vit të kenë rënë në krahasim me vitin 2023, njoftoi Ministria britanike e Mbrojtjes në përditësimin e fundit të inteligjencës.
