LIVE: Zelensky kërkon t’i jepet fund luftës – Lavrov vjen me deklaratën e radhës

NATO-ja i përfundoi stërvitjet e madhe kundër dronëve këtë javë, në të cilat mori pjesë Ukraina për herë të parë, me qëllim për të mësuar urgjentisht nga zhvillimi i hovshëm dhe përdorimi i skajshëm i dronëve – mjeteve pa pilot – në luftën në Ukrainë.

Në këto stërvitje, të mbajtura në një bazë ushtarake në Holandë, morën pjesë më shumë se 20 shtete dhe rreth 50 kompani, të cilat testuan sistemet e teknologjisë më të fundit për vërejtjen dhe rrëzimin e dronëve.

Stërvitjet 11-ditore përfunduan me një ushtrim për vërejtjen dhe rrëzimin e dronëve në një javë kur rolin i tyre vendimtar në luftën në Ukrainë u dëshmua përsëri.

Të mërkurën, një sulm i madh ukrainas me dronë e shkaktoi një shpërthim të përmasave të një tërmeti në një depo të madhe të armëve në Rusi. Të nesërmen, presidenti i Rusisë, Vladimir Putin, tha se Moska e ka rritur prodhimin e dronëve në gati 1.4 milion këtë vit.

Rritja e përdorimit të dronëve në luftë – për t’i shkatërruar objektivat dhe për ta vëzhguar fushëbetejën – e ka nxitur NATO-n ta kthejë përqendrimin kah kërcënimi që dronët mund ta përbëjnë për aleancën.

“NATO e merr shumë, shumë seriozisht këtë kërcënim”, tha Matt Roper, shef i Qendrës së Përbashkët të Inteligjencës, Vëzhgimit dhe Zbulimit në agjencinë teknologjike të aleancës.

“Kjo nuk është diçka të cilën ne duhet ta shpërfillim”, tha ai në zonën e stërvitjeve në lindje të Holandës.

Ekspertët kanë paralajmëruar NATO-n se ajo duhet të kapë hapin shpejt në kohën me dronët e luftës.

“NATO-ja ka shumë pak dronë për luftë të intensitetit të lartë kundër një armiku”, thuhet në një raport nga Qendra Evropiane për Analiza Politike nga shtatori i kaluar.

“Ajo do të përballej me sfida shumë të mëdha për t’i përdorur dronët që ka në një mjedis të kontestuar”, sipas saj./REL

Ministri i Jashtëm rus Sergei Lavrov tha se Rusia nuk dëshiron të përshkallëzojë tensionet me vendet perëndimore, por se, siç tha ai, “politikanët e këtyre vendeve sillen si fëmijë”.

“Ne nuk duam përshkallëzim… Duket se politikanët perëndimorë me të vërtetë kanë mentalitetin e një fëmije, edhe pse ata zënë poste përgjegjëse si të rritur: ministra, kryeministra, kancelarë, presidentë”, tha Lavrov.

Lavrov theksoi se për disa muaj bota ka diskutuar se si Rusia “kërcënon” dhe flet vetëm për “vijat e kuqe”.

“Në të njëjtën kohë, vendet perëndimore i kalojnë vazhdimisht dhe asgjë nuk ndodh,” tha ai.

Ministri rus shtoi gjithashtu se vendimet për t’i dhënë Kievit raketa perëndimore me rreze të gjatë dhe për të lejuar që ai të synojë objektivat ruse do të shkaktonte luftë të drejtpërdrejtë midis NATO-s dhe Federatës Ruse.

“Nëse po flasim për armë me raketa me rreze të gjatë, atëherë të gjithë e kuptojnë se vetë ukrainasit nuk do të jenë në gjendje t’i përdorin ato. Synimi, të dhënat satelitore, misionet e fluturimit, e gjithë kjo mund të bëhet vetëm nga ekspertë nga vendi që prodhon këto armë“, përfundoi Lavrov.

Samiti i dytë i paqes, i cili është planifikuar të mbahet deri në fund të vitit, duhet t’i japë fund luftës së nisur nga Rusia, tha presidenti ukrainas Volodymyr Zelensky.

“Ne duhet të forcojmë Ukrainën sa më shumë që të jetë e mundur në mënyrë që të organizojmë një samit të dytë të paqes këtë vit, i cili mund t’i japë fund kësaj lufte”, theksoi Zelensky në një konferencë për shtyp në Kiev.

Presidenti i Ukrainës vuri në dukje se të gjithë në Evropë janë të interesuar për paqen.

“Paqja nuk është ngrirje e luftës, nuk është ndonjë manipulim i ligjit ndërkombëtar”, tha ai.

Siç ishte paralajmëruar më parë, Zelensky do të prezantojë “planin e fitores” të Ukrainës në një takim me presidentin amerikan Joe Biden javën e ardhshme.

Priten takime edhe me kandidatët për postin e presidentit të ardhshëm të SHBA-së, Kamala Harris dhe Donald Trump.

Sipas Zelensky, plani i fitores, i cili do të prezantohet javën e ardhshme gjatë një udhëtimi në SHBA, “është i dizajnuar për vendime të shpejta nga aleatët e Ukrainës në tetor-dhjetor”.

Presidentja e Komisionit Evropian, Ursula von der Leyen, ka mbërritur në Kiev për të premtuar fonde për rrjetin e dëmtuar të energjisë së Ukrainës, duke i shfrytëzuar pjesërisht asetet e ngrira ruse.

Ukrainasit po përballen me ndërprerje të energjisë elektrike dhe një dimër të pasigurt përpara, me Rusinë që vazhdon të synojë infrastrukturën kryesore civile – duke përfshirë termocentralet jetike, dëmtimi i të cilave lë vendin pa energji.

Së fundmi, Komisioni Evropian premtoi një shtesë prej 160 milionë eurosh për të ndihmuar në forcimin e rrjetit energjetik të Ukrainës, me 100 milionë euro nga ato të mbledhura nga fitimet e papritura që BE-ja ka fituar nga interesat për asetet e ngrira ruse.

Ndërkohë, 60 milionë euro të tjera janë zotuar për ndihmë humanitare për civilët e detyruar të largohen nga shtëpitë e tyre nga sulmet ajrore ruse.

Bëhet e ditur se Rusia ka përshkallëzuar sulmet në të gjithë Ukrainën në përgjigje të ofensivës së papritur të ushtrisë ukrainase në rajonin e Kurskut.

Edhe para një valë të re sulmesh, më shumë se dy të tretat e kapacitetit të prodhimit të energjisë elektrike të Ukrainës para luftës u shkatërruan, u dëmtuan ose ishin nën okupim, sipas Agjencisë Ndërkombëtare të Energjisë.

“Vizita ime e 8-të në Kiev vjen në një moment vendimtar. Sezoni i ngrohjes fillon pas dy javësh dhe sulmet e pamëshirshme të Rusisë ndaj infrastrukturës civile të energjisë të Ukrainës synojnë të shkaktojnë dëme maksimale”, tha von der Leyen.

“Ne do ta ndihmojmë Ukrainën në përpjekjet e saj të guximshme për ta kapërcyer këtë”, shtoi ajo.

Ndryshe, von der Leyen do të kërkojë gjithashtu një përditësim nga presidenti ukrainas, Volodymyr Zelensky, mbi përpjekjet e Ukrainës për t’u bashkuar me Bashkimin Evropian.

Rusia ka paralajmëruar Perëndimin dhe Ukrainën me “pasoja katastrofike” nëse ndjekin, atë që Moska e cilësoi si “skenar provokues” kundër Bjellorusisë.

Zëdhënësja e Ministrisë së Jashtme të Rusisë, Maria Zakharova, u tha gazetarëve se Moska është e shqetësuar nga, siç u shpreh ajo, rritja e aktiviteteve “provokuese” të NATO-s në kufirin me Bjellorusinë.

Sipas saj, Moska nuk e përjashton mundësinë që mund të ketë përpjekje për përshkallëzimin e tensioneve në rajon.

Zakharova shtoi se Rusia ka të dislokuara në Bjellorusi armë bërthamore taktike.

Bjellorusia i ka ofruar mbështetje logjistike Rusisë, që kur Moska nisi pushtimin e paprovokuar të Ukrainës në shkurt të vitit 2022. Që atëherë, Moska ka zhvendosur në Bjellorusi armë bërthamore taktike – zhvendosja e parë e armëve të tilla jashtë Rusisë që nga rënia e Bashkimit Sovjetik.

NATO e kishte cilësuar këtë lëvizje si të “rrezikshme dhe të papërgjegjshme”.

Mbrojtja e Ukrainës “nuk duhet të sjellë luftë botërore”, thotë ministri i Jashtëm italian.

Italia është gati të dërgojë një sistem tjetër antiraketë Samp-T në Ukrainë, tha të enjten ministri i jashtëm Antonio Tajani, duke nënvizuar megjithatë nevojën për të shmangur hyrjen në luftë me Rusinë.

“Ne po dërgojmë një sistem të ri Samp-T (sistem antiraketë) për të mbrojtur spitalet, shkollat, universitetet… për këtë vend që u sulmua nga Rusia”, tha Tajani për Radio 24.

Ai shtoi se “të mbrosh Ukrainën nuk do të thotë të sjellësh një luftë botërore… Ne po ndihmojmë Ukrainën dhe duhet të arrijmë një paqe të drejtë”.

Presidentja e Komisionit Evropian, Ursula von der Leyen, më 20 shtator po zhvillon vizitë në kryeqytetin ukrainas, Kiev, për të diskutuar mbështetjen e Evropës, përgatitjet për dimër, mbrojtjen dhe përparimin sa i përket kredive të Grupit të Shtatë shteteve më të industrializuara (G7).

“Vizita ime e tetë në Kiev vjen në kohën kur nis sezoni i ngrohjes, dhe Rusia vazhdon të shënjestrojë infrastrukturën e energjisë” të Ukrainës, shkroi në X von der Leyen.

Një ditë më herët, ajo tha se 160 milionë euro nga asetet e ngrira ruse do të alokohen për të përmbushur kërkesat urgjente humanitare të Ukrainës gjatë këtij dimri.

Rusia ka shkatërruar rreth 9 gigavatë të infrastrukturës së energjisë të Ukrainës, që von der Leyen tha se janë “fuqi e barasvlershme e tri shteteve baltike”.

Presidentja e KE-së tha po ashtu se BE-ja synon të rivendosë kapacitete gjeneruese të energjisë prej 2.5 gigavatësh, gjë që sipas saj, do të rriste edhe eksportet për të furnizuar Ukrainën me 2 gigavatë energji elektrike.

Gjatë vizitës në Ukrainë, udhëheqësja evropiane do të takohet me presidentin ukrainas, Volodymyr Zelensky, dhe me zyrtarë të tjerë.

Vizita e saj e tetë në Ukrainë po zhvillohet teksa forcat ukrainase që nga gushti po kryejnë një ofensivë në rajonin rus të Kurskut, dhe forcat ruse po vazhdojnë ofensivën e tyre në lindje të Ukrainës.

Presidenti i ShBA-së, Joe Biden, njofton se javën e ardhshme do ta presë, siç tha, mikun e tij – Presidentin e Ukrainës, Zelenskyyn në Shtëpinë e Bardhë.

“Gjatë vizitës së tij, unë do të riafirmoj përkushtimin e Amerikës për të mbështetur Ukrainën teksa ajo mbron lirinë dhe pavarësinë e saj”, shkroi Biden në platfomën X.

Gjatë natës, dronët ukrainas sulmuan një nga arsenalet më të mëdhenj të Rusisë, duke shkaktuar një shpërthim të fuqishëm në qytetin Toropets, në provincën Tver, rreth 500 kilometra larg Moskës. Deri në vitin 2018, Ministria ruse e Mbrojtjes u mburr se ky objekt, që përmban raketa balistike, përfshirë Iskander, nti-ajror, municion artilerie dhe bomba të drejtuara KAB, ishte përgatitur për t’i bërë ballë edhe një shpërthimi bërthamor. Sulmi në Kiev, megjithatë, “fjalë për fjalë e fshiu nga faqja e dheut”, shpjeguan burime nga Shërbimi i Sigurisë së Ukrainës (SBU). Si e arriti Ukraina një arritje të tillë? E gjitha falë Palianytsia-s, një “raketë dron” e prezantuar disa javë më parë nga Volodymyr Zelensky.

Në një fjalim me rastin e Ditës së Pavarësisë së Ukrainës, vetë Zelensky foli për Palianitsia, një armë e prodhuar në vend që ai e quajti “raketë dron”, kundër forcave ruse.

Emri i armës, i cili i referohet një lloji buke ukrainase, është i vështirë për rusët të shqiptohet saktë dhe e ka marrë emrin nga termi i përdorur nga ukrainasit për të demaskuar infiltruesit e Kremlinit. Më 24 gusht, ne vendosëm me sukses armën tonë të re për herë të parë – Palianytsia, një raketë ukrainase me rreze të gjatë dron që e zhvilluam brenda vendit me qëllim të shkatërrimit të potencialit sulmues të armikut”, shpjegoi presidenti ukrainas.

Zyrtarët ukrainas ofruan pak më shumë detaje, duke shpjeguar se arma ndante karakteristika si me raketat ashtu edhe me dronët dhe për këtë arsye do t’i përshtatej të dy përkufizimeve. Arma është lëshuar nga një platformë tokësore, është e pajisur me një motor turbojet dhe ka një distancë prej rreth 600-700 kilometra. Pra ka rreth 20 aeroporte ushtarake ruse brenda rrezes së saj.

Autoritetet ruse arrestuan kreun e shërbimit të automjeteve të blinduara ushtarake për marrjen të ryshfetit.

Më 18 shtator, Komiteti Hetimor Rus njoftoi hapjen e procedimit penal kundër Denis Putilov, duke e akuzuar atë për marrjen e një ryshfeti prej 10 milionë rublave (rreth 100 mijë eurove) në këmbim të dhënies së kontratave në lidhje me servisimin dhe mirëmbajtjen e automjeteve ushtarake për një sipërmarrës me emrin Chudinov.

Rrethi Ushtarak Qendror është shtëpia e Divizionit të 90-të të Tankeve ndërsa Putilov dyshohet se është përfshirë në mbikëqyrjen e mirëmbajtjes dhe riparimit të tankeve dhe automjeteve të tjera të blinduara të përdorura nga divizioni i operacioneve luftarake në Ukrainë, shkruan themoscowtimes.

Që kur Andrei Belousov mori detyrën si Ministër i Mbrojtjes në maj të vitit 2024, ka pasur një rritje të konsiderueshme të hetimeve për korrupsion kundër zyrtarëve të lartë në Ministrinë ruse të Mbrojtjes.

Zhvillimi pasqyron vendosmërinë e dukshme të Belousov për të luftuar korrupsionin dhe joefikasitetin që rrënoi ministrinë nën paraardhësin e tij, Sergei Shoigu.

“Lidhjet e Putilov me Shoigun mbetën të paqarta në kohën e këtij publikimi, por arrestimi sugjeron se Belousov po përpiqet të godasë zyrtarët e korruptuar dhe joefikas përgjegjës për mirëmbajtjen e aseteve ushtarake ruse, veçanërisht automjetet e blinduara gjithnjë e më të rralla”, njoftoi Instituti amerikan për Studimet e Luftës (ISW).