Presidenti ukrainas Volodymyr Zelensky tha të hënën se Rusia ka dislokuar rreth 50,000 trupa në Kursk, rajoni jugor rus ku Kievi nisi kundërofensiven e tij të befasishme në verë.
Trupat ukrainase “vazhdojnë të mbajnë prapa grupin armik prej gati 50,000 forcash” në Kursk, tha Zelensky në një postim në Telegram pas marrjes së një informimi nga gjenerali Oleksandr Syrskyi, Komandanti i Përgjithshëm i Forcave të Armatosura të Ukrainës, shkruajnë mediat e huaja.
Kievi filloi inkursionin e tij në rajonin e Kurskut të Rusisë në gusht, duke habitur jo vetëm Moskën, por edhe aleatët e saj.
Ai tha në atë kohë, se operacioni ishte i nevojshëm, sepse Rusia kishte planifikuar të fillonte një sulm të ri ndaj Ukrainës nga rajoni.
Ukrainasit përparuan shpejt thellë në territorin rus dhe që atëherë kanë mbajtur kontrollin mbi qindra milje katrore të territorit të Rusisë.
Dhe ndërsa Rusia ka rimarrë disa vendbanime, linja e kontrollit mezi ka ndryshuar gjatë muajve të fundit.
Një zyrtar amerikan i tha CNN të dielën se Rusia ka grumbulluar një forcë të madhe prej dhjetëra mijërash – përfshirë trupat e sapo ardhura të Koresë së Veriut – për të kryer një sulm ndaj pozicioneve ukrainase në Kursk.
Zyrtari theksoi se ofensiva pritej në ditët në vijim.
Më vete, një komandant ukrainas i tha CNN të dielën se trupat e Koresë së Veriut po merrnin pjesë në operacione të drejtpërdrejta luftarake në Kursk, si dhe në operacione mbrojtëse në rajonin fqinj Belgorod të Rusisë dhe në territoret ukrainase të pushtuara nga Rusia.
