Qeveria e Kroacisë miratoi sot prokurimin e sistemit turk të dronëve Bayraktar TB2 për Ministrinë e Mbrojtjes, thanë zyrtarët.
Në një mbledhje, qeveria i dha miratimin ministrisë për të marrë detyrime në kurriz të buxhetit të shtetit për mirëmbajtjen e avionëve Rafale, si dhe u morën vendime për prokurimin e sistemit të aviacionit pa pilot Bayraktar TB2 dhe veprimet përgatitore për prokurimin e tankeve Leopard.
Paketa, që thuhet të jetë me vlerë 95 milionë dollarë, përfshin drone dhe trajnime në Turqi.
Ministri i Mbrojtjes Ivan Anushiq tha se prokurimi i Bayraktar TB2 është urgjent dhe i rëndësishëm.
"Forcat e Armatosura të Republikës së Kroacisë shprehën nevojën për prokurim prioritar dhe urgjent të sistemit të armatosur Bayraktar TB2, dhe kompania paraqiti një ofertë informative dhe një propozim për konfigurimin e Bayraktar TB2 bazuar në modelin "paketë totale". Konfigurimi bazohet në gjashtë avionë të pajisur me kamera elektro-optike për zbulim, duke përfshirë grupin fillestar të armëve, dhe siguron mbulim të dyfishtë radio të të gjithë territorit të Kroacisë në versionin stacionar dhe celular", tha ai.
Paketa përfshin një qendër komandimi dhe kontrolli, një simulator trajnimi, stacione monitorimi dhe kontrolli në tokë, stacione të dhënash tokësore, një grup fillestar pjesësh rezervë të mjaftueshme për 4 mijë orë fluturimi, duke përfshirë pajisjet e nevojshme dhe mjetet e mirëmbajtjes, garanci dy vjet ose deri në arritjen e 4 mijë orëve fluturim, qëndrimi i ekspertëve në Kroaci për një periudhë dyvjeçare, trajnimi në Turqi dhe transporti i të gjithë paketës për në Kroaci. /AA
