Nuk e ka marrë veten plotësisht, por çdo herë që shfaqet në publik, duket më mirë. Pa dyshim, është një njeri i ri. Nuk mund të përballosh një sëmundje si kanceri pa ndryshuar. Sipas një miku të familjes, Kate Middleton po e mbyll këtë vit të “vrazhdë” (siç e quajti William) me optimizëm të matur dhe me ndërgjegjësimin se gjëja më e rëndësishme janë njerëzit e dashur. Jo froni, që gjithsesi duket më pranë se kurrë, por familja.
Ndër njerëzit më me ndikim
Viti 2024 ka qenë, për mirë apo për keq, viti i saj. Edhe revista prestigjoze Time e pranoi këtë gjë, duke e përfshirë Kate-n ndër dhjetë njerëzit që kanë ndikuar më shumë në debatin publik dhe në formimin e opinioneve. Në janar, Pallati Mbretëror njoftoi për një ndërhyrje kirurgjikale të Kate në bark, për një problem të paqartë shëndetësor. Pas spekulimeve dhe teorive të shumta konspirative në rrjetet sociale, në mars vetë Kate, në një video prekëse, zbuloi se vuante nga kanceri.
Pamja e saj e zbehtë, e dobët dhe e lodhur është një imazh që do të mbetet gjatë në mendjet e njerëzve. Guximi dhe sinqeriteti i saj për të ndarë këtë luftë personale e kanë bërë një shembull të jashtëzakonshëm frymëzimi. E veçanta është se kjo pasoi një situatë që shkaktoi debate, kur një foto e Kate me tre fëmijët e saj, e publikuar për Ditën e Nënës, u tërhoq nga agjencitë për shkak se ishte manipuluar me Photoshop.
Viti më i errët për William
Në muajt pasues, polemikat nuk munguan, ndërsa mungesa e Kate nga skena publike shtoi shqetësimet. William, ndërkohë, po kalonte një nga periudhat më të errëta të jetës së tij, duke u përballur me sëmundjen e babait dhe të gruas së tij, si dhe me peshën e përgjegjësive për të ardhmen e monarkisë.
Nga ana tjetër, Kate i kushtoi gjithë energjinë e saj trajtimit dhe shëndetit, duke iu shmangur presionit mediatik dhe duke marrë kohën e nevojshme për rikuperim. Rilindja e saj filloi në qershor, kur u shfaq në ngjarjen Trooping the Colour, ditën zyrtare të lindjes së mbretit. E dobët, por e vendosur për të rifilluar jetën e saj, ajo tregoi forcë. Në shtator, me një video prekëse familjare nga natyra e Norfolkut, Kate njoftoi përfundimin e kimioterapisë dhe tërheqjen e kancerit.
Një mbretëreshë ndryshe
Sot, Kate është nën kontroll të rreptë mjekësor dhe zgjedh me kujdes ngjarjet ku merr pjesë. Ailsa Anderson, ish-zëdhënëse e mbretëreshës Elizabeth II, tha për People: “Kate do të ndjekë një strategji të vizitave të papritura dhe të minutës së fundit, që i japin fleksibilitet të madh.” Në të ardhmen, do të jetë gjithmonë ajo që do të vendosë mbi agjendën e saj.
Kate dhe William po përgatiten për rolet e tyre të ardhshme më herët nga sa e mendonin. Sipas biografes Sally Bedell Smith, Pallati ka nisur prej kohësh përgatitjet për pasimin e fronit. Shenja më e qartë e kësaj strategjie ishte pjesëmarrja e William-it, dhe jo e mbretit Charles, në inaugurimin e Katedrales së Notre-Dame në Paris, ku ai përfaqësoi monarkinë britanike përballë liderëve botërorë.
Një mbretëreshë part-time
Ndryshe nga paraardhësit, Kate dhe William janë të vendosur të mos sakrifikojnë shëndetin e tyre apo kohën me fëmijët për hir të detyrimeve mbretërore. Catherine, mbretëresha e ardhshme, ka të ngjarë të jetë një mbretëreshë “part-time,” por pa ndjenja faji. Për të, familja është gjithmonë përparësia kryesore, pavarësisht afërsisë me fronin. / bota.al
