“Gaza i përket palestinezëve dhe atyre që jetojnë atje”, tha José Manuel Albares, Ministër i Jashtëm i Spanjës, në një intervistë për Euronews në programin Europe Conversation, duke reaguar ndaj komenteve të fundit të Donald Trumpit.
Presidenti i SHBA-së kërkoi “pastrimin“ e Rripit të Gazës dhe zhvendosjen e banorëve të saj në Jordani dhe Egjipt, të cilat të dyja vendet e hodhën poshtë këtë propozim.
Ideja e Trumpit është në kundërshtim me politikën e jashtme të SHBA-së deri më tani, e cila ka mbështetur një zgjidhje me dy shtete, një që mbështetet gjithashtu nga BE-ja.
„Sigurisht, Gaza i përket palestinezëve dhe njerëzve që jetojnë atje. Palestinezët që jetojnë në Gaza duhet të qëndrojnë aty dhe ne duhet t’i ndihmojmë ata të rindërtojnë një jetë të re”, tha José Manuel Albares.
“Natyrisht, duhet të mbajmë vëmendjen për kolonët dhunues që vrasin edhe palestinezë të pafajshëm në Bregun Perëndimor. Kolonitë ilegale janë kundër ligjit ndërkombëtar. Kombet e Bashkuara e kanë dënuar këtë shumë herë”, shtoi ministri i Jashtëm i Spanjës.
Sipas Albares, komuniteti ndërkombëtar duhet të ofrojë ndihmë humanitare, mbështetje përmes OKB-së, ndihmë për rindërtimin dhe “mbështetje politike sa më shpejt që të jetë e mundur“.
Albares gjithashtu kritikoi aleatët evropianë.
„Ka disa shtete që do të lejojnë Netanyahun të hyjë në territorin e tyre. Polonia, Hungaria, potencialisht Franca, edhe pse ekziston një urdhërarrest nga Gjykata Ndërkombëtare. Pra, si ka vepruar Evropa kur vjen puna për mbrojtjen dhe mbështetjen e ligjit ndërkombëtar në lidhje me Palestinën“, shtoi politikani spanjoll.
Ai beson se BE-ja duhet të krijojë politikën e saj pa marrë parasysh atë që bëjnë apo mendojnë të tjerët.
“Mendoj se po kalojmë shumë kohë duke u shqetësuar për atë që thotë apo mendon dikush tjetër. Ajo që është e rëndësishme për mua është ajo që do të bëjmë ne, sa të bashkuar do të jemi si evropianë, sa të bashkuar do të jemi përreth vlerave tona. Dhe vlerat tona janë shumë të qarta. Sovraniteti i barabartë i shteteve dhe integriteti territorial”, tha ai.
Ministri spanjoll kërkoi që BE-ja të mbështesë UNRWA-n, agjencinë e OKB-së që ndihmon palestinezët. Në anën tjetër, Izraeli ka thënë se UNRWA duhet të ndalojë operacionet dhe të largohet nga Jerusalemi deri më 30 janar.
