Sipas raportimeve të New York Times, ushtarët koreanoveriorë që iu bashkuan aleatëve rusë në luftën kundër forcave ukrainase janë tërhequr nga vija e parë e frontit pas humbjeve të mëdha, sipas burimeve të afërta me zyrtarët ukrainas dhe amerikanë.
Trupat koreanoveriore, të cilat u dërguan për të forcuar forcat ruse që po përpiqeshin të zmbrapsnin ofensivën ukrainase brenda kufijve rusë, nuk janë parë në fushën e betejës për rreth dy javë, sipas burimeve anonime për shkak të ndjeshmërisë së informacionit ushtarak dhe të inteligjencës.
Mbërritja e rreth 11 mijë ushtarëve koreanoveriorë në Rusi në muajin nëntor shkaktoi shqetësim në Ukrainë dhe te aleatët e saj perëndimorë, të cilët kishin frikë se vendosja e tyre mund të përbënte një përshkallëzim të rëndësishëm në luftën që zgjat tashmë gati tre vjet.
Numri i trupave koreanoveriore është përgjysmuar brenda tre muajve, sipas gjeneralit Oleksandr Sirski, komandantit të forcave të armatosura të Ukrainës.
Ushtarët ukrainas që janë përballur me koreanoveriorët i kanë përshkruar ata si luftëtarë të ashpër, por mungesa e organizimit në radhët e tyre dhe koordinimi i dobët me njësitë ruse ka çuar shpejt në humbje të mëdha.
Sipas një zyrtari ukrainas dhe raporteve nga fronti, që nga mbërritja e tyre, trupat koreanoveriore janë lënë në mëshirë të fatit, kanë përparuar me pak mjete të blinduara dhe rrallëherë janë tërhequr apo rigrupuar.
Koreja e Veriut gjithashtu po furnizon Rusinë me miliona predha artilerie, të cilat tani përbëjnë rreth gjysmën e konsumit ditor të municioneve ruse, përveç raketave dhe projektileve, sipas të dhënave nga inteligjenca perëndimore dhe ukrainase.
Në këmbim, Rusia i ka siguruar Koresë së Veriut naftë, ushqim dhe disa përmirësime ushtarake.
Verën e kaluar, disa muaj përpara se Ukraina të niste ofensivën e saj në Kursk, Putin u takua me Kim Jong-un në Phenian, ku ata ripërtërinë një marrëveshje të mbrojtjes reciproke dhe bashkëpunimit ushtarak nga koha e Luftës së Ftohtë.
