Policia gjermane tha të mërkurën se pret që Konferenca e Sigurisë e Mynihut e kësaj fundjave, një mbledhje vjetore e liderëve botërorë dhe ekspertëve të mbrojtjes, të provokojë rreth 40 protesta të ndryshme.
”Këtë herë ka më shumë protesta nga sa kemi parë prej një kohe të gjatë”, tha Christian Huber, kreu i Departamentit të Operacioneve në Selinë e Policisë së Mynihut.
Huber tha se “situata aktuale politike dhe koha e konferencës pak përpara zgjedhjeve të përgjithshme të Gjermanisë më 23 shkurt do të kontribuojnë në rritjen e numrit të protestave”.
”Forumi hapet të premten, por shumica e demonstratave do të jenë të shtunën”, tha ai.
Një grup i quajtur Aleanca e Veprimit Kundër Konferencës së Sigurisë së NATO-s regjistroi një marshim me deri në 1 500 persona, ku lista e folësve përfshin edhe ish-ministrin grek të Financave, Yanis Varoufakis.
Grupet pro palestineze pritet të marrin pjesë.
Presidenti ukrainas, Volodymyr Zelensky, zëvendëspresidenti i SHBA, JD Vance dhe sekretari amerikan i Shtetit, Marco Rubio janë ndër emrat e profilit të lartë që pritet të marrin pjesë në konferencë, e cila zgjat deri të dielën.
Një perimetër sigurie është vendosur rreth vendit të konferencës, hotelit luksoz ”Bayerischer Hof” dhe është vendosur një ndalim fluturimi mbi qytet, përfshirë edhe për dronët.
Sipas Huber, rreth 5 000 oficerë policie do të jenë në detyrë gjatë tre ditëve të konferencës, me mbështetje nga e gjithë Gjermania dhe madje edhe Austria.
