Kancelari gjerman Olaf Scholz deklaroi sot se sulmuesi 24-vjeçar afgan do të dëbohet nga Gjermania, pasi një nënë 37-vjeçare dhe vajza e saj dyvjeçare humbën jetën si pasojë e sulmit me veturë gjatë një proteste sindikale ditën e enjte.
Zyra Shtetërore e Bavarisë për Hetimin Kriminal njoftoi më herët se nëna dhe vajza e saj dy vjeçe ndërruan jetë nga plagët e rënda, kur një person i armatosur hyri me veturë në një protestë.
Të paktën 39 persona u lënduan dhe hetuesit aktualisht dyshojnë nëse sulmi ishte i motivuar nga islamizmi. Shoferi aktualisht ndodhet në paraburgim.
Scholz, i cili vizitoi skenën e krimit në qendër të Munihut përpara një mitingu zgjedhor, tha se ajo që ndodhi është shumë e keqe dhe se dënimi i qartë i një vepre penale “parandalon akte të tilla” në të ardhmen.
"Ne kurrë nuk do të pajtohemi me akte të tilla. Ai (sulmuesi) do të kthehet në vendin nga vjen pasi të kryejë dënimin. Kushdo që kryen një akt të tillë nuk ka bazë për apel," tha kancelari Scholz.
Zërat liberalë që argumentojnë se Gjermania, si një nga vendet më të pasura në botë, ka një përgjegjësi morale për të ndihmuar refugjatët, po bien gjithnjë e më shumë në konflikt me konservatorët dhe të djathtën ekstreme që duan që vendi të bëhet më i rreptë ndaj migracionit.
