Koreja e Veriut po plotëson 50 për qind të nevojave ruse për municion në luftën kundër Ukrainës, deklaroi sot Kiril Budanov, kreu i shërbimit të inteligjencës ushtarake të Ukrainës.
Ai në një konferencë për media tha se Koreja e Veriut ka filluar gjithashtu dërgesat në shkallë të gjerë të obusëve vetëlëvizës 170 milimetra dhe raketave 240 milimetra në Rusi.
“Koreja e Veriut ka dorëzuar tashmë raketa balistike në Rusi dhe planifikon të dërgojë 148 raketa të tjera në vitin 2025”, tha ai.
Oleh Ivashchenko, kreu i Shërbimit të Inteligjencës së Jashtme të Ukrainës, në një postim në X, ka bërë të ditur se Rusia këtë vit planifikon të prodhojë mbi 7 milionë predha artilerie dhe mortajash, dhe rreth 3 mijë raketa.
“Rusia e kupton se prodhon shumë më tepër municion sesa të gjitha vendet evropiane së bashku”, ka shkruar ai.
Kujtojmë, Koreja e Veriut ka dërguar 11 mijë trupa për të mbështetur agresionin rus në Ukrainë, duke shënuar përfshirjen e parë të madhe të Phenianit në luftë që nga vitet 1950.
