Këshilli i Sigurimit i OKB-së ka miratuar rezolutën amerikane që bën thirrje për t’i dhënë fund luftës në Ukrainë pa përmendur agresionin e Rusisë.
Këshilli i Sigurimit i OKB-së ka miratuar rezolutën e hartuar nga SHBA për të shënuar përvjetorin e tretë të luftës në shkallë të plotë të Rusisë në Ukrainë, pa përmendur agresionin e Rusisë.
Rezoluta mori 10 vota pro, ndërsa pesë anëtarë, përfshirë Mbretërinë e Bashkuar dhe Francën, abstenuan nga votimi.
Më herët, Asambleja e Përgjithshme e OKB-së të hënën mbështeti një rezolutë të hartuar nga Ukraina dhe BE që dënon Rusinë dhe i bën thirrje asaj të largojë trupat e saj nga Ukraina.
Votimi i Këshillit të Sigurimit të OKB-së për një projekt-rezolutë të udhëhequr nga SHBA-ja që bën thirrje për t’i dhënë fund luftës në Ukrainë erdhi pasi Franca i kërkoi këshillit prej 15 anëtarësh të shtyjë votimin.
Këshilli hodhi poshtë propozimin për shtyrjen e votimit me gjashtë vota pro, tre kundër dhe gjashtë abstenime.
Gjatë takimit të këshillit në Nju Jork, ambasadorja amerikane Dorothy Shea tha se ishte koha për të rikthyer OKB-në dhe Këshillin e Sigurimit të OKB-së në qëllimin e tij fillestar: ruajtjen e paqes dhe sigurisë ndërkombëtare, duke përfshirë zgjidhjen paqësore të mosmarrëveshjeve.
Projekt-rezoluta e SHBA-së “është elegante në thjeshtësinë e saj – një hap i parë simbolik dhe i thjeshtë drejt paqes”, tha ajo, duke shtuar se “tre paragrafët e shkurtër i bëjnë jehonë frymës së Kartës së OKB-së”.
