Partia e ndaluar e Punëtorëve të Kurdistanit (PKK) ka shpallur një armëpushim të menjëhershëm me Turqinë pas thirrjes për paqe të liderit të saj të burgosur Abdullah Öcalan.
PKK tha të shtunën në një deklaratë të publikuar nga një agjenci lajmesh afër saj, se do të ndjekë thirrjen e Öcalan për t'i dhënë fund luftës së armatosur.
PKK shprehu gjithashtu shpresën se Turqia do ta lironte Öcalanin, i cili ndodhet në izolim që nga viti 1999, në mënyrë që ai të mund të drejtonte procesin e çarmatimit.
Duhet të krijohen edhe kushtet e nevojshme politike dhe demokratike për një proces të suksesshëm.
Deklarata Historike
Në një deklaratë historike të enjten, Öcalan u bëri thirrje mbështetësve të tij, që të dorëzojnë armët pas më shumë se 40 vitesh luftime kundër shtetit turk dhe të shpërbëjnë PKK-në.
Masa synon t'i hapë rrugën paqes, në konfliktin në të cilin janë vrarë më shumë se 40,000 njerëz.
Si qeveria nacional-konservatore e Presidentit Recep Tayyip Erdoğan, ashtu edhe partia opozitare pro-kurde DEM, e cila veproi si ndërmjetëse, mbështesin thirrjen e Öcalan.
Një aleat nacionalist i Erdoganit, i kishte sugjeruar çuditërisht një thirrje të tillë Öcalan-it në tetor.
Përfaqësuesit e DEM-it më pas e vizituan Öcalanin disa herë në burg dhe diskutuan procedurën. PKK është klasifikuar si organizatë terroriste nga Turqia, Bashkimi Evropian dhe SHBA.
Thirrja nuk vlen për luftëtarët e SDF
“Ne, PKK, pajtohemi plotësisht me përmbajtjen e thirrjes dhe deklarojmë se do të dëgjojmë dhe zbatojmë domosdoshmëritë e thirrjes”, thuhet në deklaratën e publikuar nga agjencia e lajmeve Firat.
PKK do të ndërpresë menjëherë të gjitha armiqësitë, nëse nuk sulmohet.
Megjithatë, masa të tilla si vendosja e armëve, mund të zbatoheshin vetëm nën udhëheqjen e Öcalan.
Partia pro-kurde DEM i bëri thirrje qeverisë të premten të ndërmarrë hapa për të forcuar demokracinë.
Qeveria e Erdoganit duhet të "tregojë vullnet politik", tha nënkryetari i DEM-it Tuncer Bakirhan në një intervistë për Haberturk TV të premten. Reagimi i qeverisë tani është vendimtar.
Qeveria deklaroi se nuk do të negocionte me PKK-në dhe kërkoi që të gjitha milicitë kurde, përfshirë ato në Irak dhe Siri, të dorëzonin armët e tyre.
Aleanca e milicisë siriane SDF, të cilën Turqia e sheh si një degë e PKK, e mirëpriti thirrjen e Öcalan. Megjithatë, ai deklaroi se thirrja nuk vlente për luftëtarët e SDF.
Fokusi në Irakun verior
Që nga viti 1999, Öcalan ka qenë kryesisht i izoluar në një burg në ishullin İmralı, në jug të Stambollit. Ai më parë ishte mposhtur nga forcat speciale turke në Kenia dhe ishte sjellë në Turqi.
PKK ka luftuar kundër shtetit turk që nga viti 1984. Qëllimi ishte një rajon i pavarur kurd. Në vitin 2015, bisedimet e paqes dështuan.
Në të kaluarën, lufta e PKK-së për autonomi kurde u përqendrua kryesisht në juglindjen e Turqisë, kryesisht kurde. Sot fokusi është në Irakun verior, ku është vendosur PKK.
PKK ka ndikim edhe në Siri, me popullsinë e saj kurde. Ushtria turke vazhdimisht ndërmerr veprime, kundër milicive kurde në dy vendet fqinje.
