Sezoni i karnavaleve në Gjermani u shndërrua në një tragjedi këtë të hënë, kur një makinë goditi turmën e njerëzve në qytetin Mannheim, duke lënë të paktën dy të vdekur dhe disa të plagosur. Incidenti ndodhi ndërsa qytetarët po festonin sezonin e karnavaleve, dhe makina e zezë iu drejtua turmës me shpejtësi të madhe.
Policia gjermane ka arrestuar autorin e dyshuar të sulmit, një 40-vjeçar gjerman, dhe ka nisur hetimet për të zbuluar nëse ka të tjerë persona të përfshirë në këtë akt të dhunshëm. Zëdhënësi i policisë tha se ende nuk është e qartë nëse sulmi kishte një motiv të qartë apo nëse ka pasur ndihmës.
Përveç kësaj, policia ka bërë thirrje që qytetarët të qëndrojnë në shtëpi dhe të shmangin çdo lëvizje të panevojshme për të siguruar rendin dhe sigurinë.
Siguria ka qenë një shqetësim i madh në Gjermani pas një serie sulmesh të dhunshme që kanë ndodhur gjatë javëve të fundit, përfshirë disa goditje me makinë që kanë lënë viktima në qytetet si Magdeburg dhe Mynih, dhe një sulm me thikë në Mannheim në maj të 2024. Policia ishte në gatishmëri të lartë për këtë ngjarje karnavaleske, pasi në disa media sociale të lidhura me grupin militant Shteti Islamik ishte bërë thirrje për sulme gjatë aktiviteteve festive në qytetet Cologne dhe Nuremberg.
