Arbion Balilaj ishte autori i një autogoli për Flamurtarin në ndeshjen e fundit të humbur 0-3 ndaj Besës. I riu pranon se gaboi, ndërsa e “qan” ende atë episod.
Megjithatë, sulmuesi shprehet se po përpiqet ta hedhë pas krahëve, ndërsa thotë se në atë rast ka ndikuar edhe eksperienca e portierit: “Nuk mund të them që unë jam pa faj. Kam pjesën time të gabimit, ndoshta më të madhen. Nuk dua të shfajësohem, por mund të them se edhe eksperienca e portierit ndikon shumë. Pjesa e parë ishte e mirë për ne, por nuk u treguam të saktë para porte. Unë te Flamurtari ndihem mirë pasi jam në shtëpinë time dhe tek ekipi i zemrës, ndaj premtoj maksimumin tim”, tha fillimisht Balilaj.
MOTIVIMI – 20-vjeçari gjithashtu vlerëson edhe qëndrimin e mbajtur nga administratori Sinan Idrizi, pas ndeshjes me Besën. “E vlerësoj qëndrimin e presidentit Idrizi. Ai na dha shumë kurajo.
Pas ndeshjes me Besën na tha se kemi mbështetjen e tij. Kjo gjë na ngroh shumë, pasi jemi lojtarë të rinj. Të na japin besim dhe të bëjnë durim, pasi me punë dhe bashkëpunim do të arrijmë aty ku e kemi vendin”, u shpreh sulmuesi.
EGNATIA – Balilaj flet edhe për ndeshjen me Egnatian, ku Flamurtari do të luajë të shtunën në transfertë. “Ndeshja me Egnatian është e vështirë. Kundërshtari është i fortë e aq më tepër udhëheq i vetëm klasifikimin. Por ne do të udhëtojmë për të dhënë maksimumin dhe do të luftojmë për të marrë fitoren”, përfundon vlonjati.
