Drejtuesit e Interit dhe trajneri Antonio Conte e kanë të qartë strategjinë e merkatos për muajin janar, pasi kanë planifikuar largimin e 5 futbollistëve dhe afrimin e 3 apo 4 të tjerëve.
Kështu emrat me valixhet gati janë Christian Eriksen, Matias Vecino, Radja Nainggolan, Andrea Pinamonti e Ivan Perisic, pasi që të pestë nuk shihen pjesë e projektit të trajnerit Conte dhe kanë luajtur shumë pak këtë sezon.
Për danezin ka kërkesa në Premier League dhe nuk pritet të jetë e vështirë shitja e tij, ashtu si edhe për Perisic kanë shfaqur interes disa klube të kampionatit gjerman, por e vështirë duket situate për tre të tjerët.
Kjo pasi Nainggolan kërkohet vetëm nga Cagliari, por edhe këta të fundit e duan në huazim me detyrim blerjeje për një shifër modeste, shumë larg pretendimeve të Interit, megjithatë drejtuesit zikaltër mund të dorëzohen dhe të lënë të largohet në janar.
Nga ana tjetër uruguaiani Vecino vjen nga një dëmtim i gjatë dhe në verë kërkohej nga Napoli, por në fund Gattuso zgjodhi francezin Bakayoko, ndërsa tani për të ka shprehur interes vetëm Torino, që gjithsesi nuk mund të plotësojë pretendimet ekonomike të zikaltërve.
Sa i përket Pinamontit, bëhet fjalë për një sulmues të ri, të talentuar, që ka të ardhmen përpara dhe në janar do të provohet sërish shkëmbimi me sulmuesin Gervinho, i cili kërkohet me ngulm nga Conte, duke parë edhe dëmtimet e shpeshta të Alexis Sanchez.
Përveç Gervinhos, Interi do të provojë të sjellë edhe një mesfushor, me argjentinasin Rodrigo De Paul në “pole” për të veshur fanellën zikaltër, por nuk përjashtohet edhe Paredes, që mund të përfshihet në marrëveshje shkëmbimi me Eriksen, nëse danezi zgjedh PSG-në si destinacionin e tij të ardhshëm.
Ndërkohë Conte vijon të ngulmojë për afrimin e një mesfushori të majtë, që të jetë në gjendje të mbulojë korsinë dhe të paraqesë një alternativë të vlefshme për anglezin Young, i cili me 26 vitet mbi shpinë nuk garanton përballimin e intensitetit të kampionatit.
Emrat e miratuar nga trajneri dhe për të cilët po punojnë drejtuesit zikaltër janë ata të Emerson Palmeirit dhe Marcos Alonsos, dy anësorët e Chelsea-t, të cilët kanë përfunduar jashtë planeve të Lampard dhe po luajnë shumë pak.
Më i arritshëm është anësori spanjoll, që prej javësh po e sheh skuadrën vetëm nga tribuna ose televizori, ndaj londinezët janë gati ta japin në huazim me të drejtë blerjeje. Sa i përket Emerson, drejtuesit e Chelsea-t e kanë bërë të qartë se nuk do të heqin dorë për më pak se 15 milionë euro.
Ndërkohë ditët e fundit ka nisur të diskutohet gjatë edhe emri i fantazistit dhe kapitenit të Atalantës, Papu Gomez, i cili ka prishur raportet me klubin bergamask dhe pritet të largohet në muajin janar. Mosha e argjentinasit ka ulur disi optimizmin mes drejtuesve zikaltër, por nëse Atalanta do të pranonte ta linte të lirë kapitenin për një shifër modeste, atëherë te Interi janë gati të përfitojnë./SS/.
