Historia e pretenduar e mashtrimit prej 30 milionë eurosh, viktimë e së cilës ishte Antonio Conte, mund të ketë pasoja kriminale në Itali.
Trajneri i Interit, së bashku me sipërmarrës të tjerë, menaxherë dhe personalitete të njohura, po lëviz ligjërisht për të rimarrë paratë e humbura në investimet fantazmë, me ndërmjetësin Massimo Bochicchio. Flitet për një qarkullim midis 200 dhe 500 milionë euro, shkruan telesport.
Verën e kaluar, gjykata tregtare angleze kishte urdhëruar Bochicchio që t’ia kthente 30 milionë Contes, por, sipas gazetës “La Verità”, ato para nuk mbërritën kurrë. Në fund të vitit, një hetim nga zyra e prokurorit të Modena u hap gjithashtu për mashtrimet e ndërmjetësit. Pra, Bochicchio është nën hetim për përvetësim.
Hetimet janë në fillim, por disa nga të mashtruarit mund të dëgjohen, duke përfshirë edhe vetë Conte. Lista e kreditorëve, sidoqoftë mund të rritet: shumë klientë të Bochicchio kanë filluar të lëvizin me avokatët e tyre.
Është gjithashtu e mundur që dosjet e reja të hetimit mund të hapen nga prokurorët e tjerë italianë. Një nga pikat për t’u kuptuar më mirë është roli i bankave, HSBC dhe Credit Suisse. Midis kreditorëve të Bochicchio janë edhe ish-lojtari i Milanit e Romës, Stephan El Shaarawy, dhe Luca Bascherini, agjenti i Claudio Ranieri, trajnerit aktual të Sampdoria.
