Pas dy rezultateve jo të mira, Manchester United rikthehet te fitorja në Premier League dhe e bën këtë në mënyrën më spektakolare të mundshme.
“Djajtë e Kuq” dhuruan emocione në “Old Trafford” duke mposhtur me rezultatin e thellë dhe turpërues 9-0 Southamptonin.
Fitorja më e thellë e regjistruar në sezon të kampionatit anglez dhe mbi të gjitha një sukses historik për skuadrën e Ole Gunnar Solskjaer.
Sfida nisi në mënyrën më të keqe të mundshme për shënjtorët të cilët mbetën me 10 lojtarë që në minutën e 2-të pas daljes me karton të kuq të Jankewitz.
Wan Bissaka, Rashford, autogoli i Bendarek dhe Cavani i çuan shifrat në 4-0 që në pjesën e parë duke hipotekuar fitoren e United.
Golavarazhi i “Djajëve të Kuq” u përmirësua ndjeshëm në fraksionin e dytë kur skuadra e Solskjaer shënoi dhe 5 herë të tjera.
Martial, McTominay, Bruno Fernandes me penallti, sërish Martial dhe në fund James e çuan rezultatin në 9-0, me United që ruajti vendin e dytë edhe pas javës së 22-të tashmë me 44 pikë po aq sa edhe City kryesues që ka luajtur dy ndeshje më pak.
Për t’u përmendur që Southampton e mbylli ndeshjen me 9 lojtarë pasi në të 86-ën u ndëshkua edhe Bendarek me të kuq.
