Renato Arapi, kapiteni i Teutës, doli dje përkrah trajnerit Martini para mediave dhe foli për duelin e sotëm kundër Kukësit. Arapi pohoi se ka besim tek ekipi duke e lënë pas shijen e hidhur të humbjes me Tiranën. Kapiteni theksoi se Teuta është ekipi më korrekt dhe si ka falur askush asgjë deri tani dhe eksperienca do të vendosë në fund.
Çfarë nuk shkoi ndaj Tiranës?
Normalisht që diçka ndikon, por duke parë eksperiencën e lojtarëve që kemi. Besoj se është një moment që do ta kalojmë si çdo herë tjetër kur kemi pësuar disfata në kampionat. Gjithmonë pas humbjeve kemi reaguar shumë mirë dhe besoj e shpresoj që ta fitojmë ne ndeshjen e radhës.
Keni çaluar në sulm. Si mendoni ta zgjidhni për pjesën e mbetur?
Përjashto ndeshjen më Tiranën që e pamë të gjithë, ishte një ndeshje e dobët. Në të gjitha të tjerat ne kemi dominuar, si ndaj Laçit, Apolonisë, por edhe ndaj Skënderbeut deri në momentin që shënuam. Kështu që, nuk është diçka për t’u shqetësuar. Goli ka munguar jo vetëm për sulmuesit tanë, por edhe te të tjerët, ku ka ekipe që nuk kanë shënuar aq sa duhet. E rëndësishme është që ne jemi në momentin më të mirë për të treguar vlerat si ekip dhe eksperiencën që kemi. Kampionati është ende i gjatë dhe ndeshjet direkte do të vendosin.
I frikësoheni gjykimit, që mund të ndikojë në këtë fazë të sezonit?
Ne nuk duam të merremi me këtë, por po t’i analizojmë të gjitha javët e luajtura, shumë nga vendimet e marra na kanë dëmtuar. Nuk mund të them nëse ato kanë qenë me dashje.
Unë s’e mendoj kurrë këtë pjesë, ndaj shpresoj që të kenë qenë pa dashje. Ne të gjithë e dimë që ku afrohet fundi, kampionati bëhet me i vështirë. E dimë çfarë ndodhë në kampionati shqiptar, por dua të sigurojë vetëm diçka: Teuta është një nga ekipet me korrekte dhe më “Fair Play” i Superiores dhe deri në këtë moment që po flasim i kemi marrë pikët me meritë dhe ashtu do vazhdojmë deri në fund.
Kush mendoni se do ta bëjë diferencën në garën për titull këtë fund kampionati?
E kam thënë edhe herë të tjera, kur ke lojtarë me eksperiencë, çdo gjë është edhe me e lehtë. Ajo që mendoj se na duhet tani, është besimi dhe vendosmëria. Është një fazë shumë e rëndësishme, por edhe lodhja duket qartë te të gjitha ekipet. Mendoj se kush do ta menaxhojë më mirë, do të fitojë edhe titullin kampion.
