Edhe 90 minuta për të mësuar kampionen e re të Shqipërisë. Sot, në orën 17:00, luhet akti final i sezonit në Kategorinë Superiore, ku pas një rrugëtimi të gjatë do të jepen verdiktet kryesore të sezonit. Si rrallë herë, “mbreterësha” e re e futbollit shqiptar do të kurorëzohet në “fotofinish”. Tirana ka “abdikuar” nga froni disa javë para fundit, ndërsa Kukësi, skuadra nënkampione e sezonit të kaluar “ka hequr dorë” ndoshta që në start nga ky objektiv madhor. Në lojë, matematikisht janë katër ekipe, por shumë më pranë vijës së finishit, e shkëputur nga rivalet, është Teuta.
“Djemtë e Detit” e kanë fatin në dorën e tyre. Mjafton të fitojnë ndaj Apolonisë së vendit të fundit dhe janë kampionë, pak rëndësi ka ç’ndodh në sfidat e tjera. Vllaznia vjen e dyta me mundësitë më të mëdha për t’u shpallur kampione, por sigurisht ndjeshëm pas Teutës. Shkodranët duhet patjetër të fitojnë ndaj Laçit në “Loro Boriçi”, madje me një një gol më thellë se fitorja hipotetike e “Djemve të Detit” ndaj Apolonisë.
Edhe më pakta shanset që Partizani të ngrejë lart trofenë. Të kuqtë duhet patjetër të fitojnë në Ballsh, me Bylisin që kërkon të luajë shanset e tij për mbijetesë, me kusht që Teuta dhe Vllaznia të mos fitojnë në sfidat respektive.
Matematika, në fakt, mban në lojë edhe Laçin. Skuadra kurbinase do të shpallej kampione nëse fiton me Vllazninë, shoqëruar me humbjen e Teutës me Apoloninë në “Niko Dovana” dhe kthimin e Partizanit ka fitore nga Ballshi.
Titulli kampion në Superiore, në 90 minutat e mbetura, është një ekuacion me shumë të panjohura, por “zgjidhjen” me të thjeshtë e ka në dorë Teuta.
Sa i përket garës për mbijetesë, Bylisi duhet patjetër të fitojë me Partizanin dhe të shpresojë që Kukësi t’i marrë pikë Kastriotit, kurse Tirana-Skënderbeu luhet vetëm për të respektuar kalendarin.
E Mërkurë, 26 Maj 2021
(ora:17:00)
Vllaznia – Laçi
Teuta – Apolonia
Bylis – Partizani
Kukësi – Kastrioti
Tirana – Skënderbeu
