Aventura e Armando Sadikut në futbollin e Amerikës së Jugut mund të përfundojë shumë më shpejt se sa mendohej. Sulmuesi i përfaqësueses shqiptare është pranë lamtumirës nga Bolivar, pavarësisht mesazhit të tij në rrjetet sociale kushtuar tifozëve se nuk do të dorëzohej e do të mbronte me zjarr ngjarat e fanellës së kampiones së Bolivisë.
Shkak për këtë divorc të parakohshëm është bërë dështimi në aktivitetet ndërkombëtare për klubin e tij.
Bolivar u eliminua në play-off në Kupën Libertadores e më pas në fazën në grupe të Kupës Sudamertikana, ndërsa pretendohej që të bënte hapa para në këto turne. Pritshmëria më e madhe ishte për Armando Sadikun, nga i cili priteshin gola meqë shkonte në Bolivi si një golashënues race.
Por goleadori shqiptar nuk arriti të linte shenjë në arenën ndërkombëtare, duke gabuar edhe penallti në ndeshej kyçe e si rrjedhojë Bolivar iku nga turnetë në fjalë pa lënë shenjë.
Një dështim që do të sjellë ndryshime të mëdha, që filluan me largimin e trajnerit Naço Gonzalez, ai që kishte kërkuar Sadikun meqë e njihte nga periudha në Spanjë. Kjo ka kaluar plotësisht në plan të dytë sulmuesin shqiptar dhe në ndeshjen e fundit në grupe në Sudamerikana, ndaj argjentinasve të Arsenal Sarandi, Sadiku qëndroi gjatë 90 minutave në stol në humbjen 3-1.
Një përjashtim që duket si sinjal i qartë lamtumire pasi klubi nuk i beson më atij dhe së shpejti pritet të nisin bisedimet për të ndërprerë marrëveshjen mes palëve, të nënshkruar vetëm në janar.
