Jose Mourinho rikthehet pas 11 vitesh që të trajnojë në Serinë A. Tekniku portugez la Interin në vitin 2010 ku fitoi dhe tripletën legjendare, për t’u rikthyer sërish në Itali pas 11 vitesh në pankinën e skuadrës së Romës. Luzitani sot është prezantuar në konferencë për shtyp sot si trajneri i ri verdhekuq, duke deklaruar se tek Roma nuk është për pushime, por për të punuar:
Ambienti – “Kam ndërruar numrin tim të celularit tre herë aq shumë po më telefonojnë. Tani na pret një punë e madhe grupi dhe për këtë jemi të përqendruar. Mbase për gazetarët nuk është e pëlqyeshme të punojnë me mua sepse unë punoj për të mbrojtur klubin tim. Kjo është thelbësore për mua.”
Ndryshimi i mentalitetit të Romës – “Gjëja e parë është që të njoh grupin. Nuk mundem të ndryshoj asgjë sepse nuk njoh se çfarë kam në dispozicion. Sot është dita e parë e stërvitjes, dhe lojtarët duhet ta kuptojnë mënyrën time të të punuarit sepse është e thjeshtë. Në momentin që kam mbërritur kam kryer karantinën dhe më kanë lejuar që të jetoja në brendësi të qendrës stërvitore.”
Merkato – “Unë nuk mund të flas për asnjë lojtar, sigurisht flas me drejtorin sportiv. Por me lojtarët për merkato kurrë.”
Spinacola dhe Kristante – “Jemi të lumtur që i kemi në një kombëtare që janë duke bërë shumë mirë dhe kanë 50% të mundësive që të rikthehen këtu si kampionë të Europës. Jam vërtetë i lumtur për këtë situatë. Për Spinacolën më vjen shumë keq. Nuk do ta kemi për shumë kohë. Të shohim se çfarë mund të bëjmë.”
Roma – “Më ka tërhequr projekti i Romës. Ky projekt është i qartë. Ky qytet është i rëndësishëm, por unë nuk jam për turizëm apo për pushime, jam këtu për të punuar.”, përfundoi Murinjo.
