Çudi se si në vitet e pasluftës, sidomos në vitet e fundit janë lënë në harresë emrat e mëdhenj të sportit të Republikës së Kosovës, nuk organizohen turnetë përkujtimorë.
Ditë me parë, legjenda e futbollit, ish portieri i mirënjohur Esat Mehmeti, ka shtruar pyetje, ku na mbeten disa turnetë për legjendat e futbollit, si Riza Lushta, Naim Kryeziu, Favzi Rama e Faton Domi, Burim Hatipi etj.
Me këtë rast ka komentuar edhe Arbon Desku, veprimtar i shquar sportiv në vitet më të rënda (1991-1999), në kohën e gjeneratës së sakrificës, ish drejtor dhe nënkryetar i klubit të futbollit Prishtina, ish kryetar i KF Dukagjinit nga Klina, me të cilën doli kampion i Kosovës në vitin 1993-1994. Po ashtu Desku kontriboi shumë edhe në vitet e pasluftës.
Në vitet më të vështira (vitet e 90-ta), u organizua turneu përkujtimor ‘Rama - Domi’, duke iu falënderuar ideatorit Arbon Desku
Çfarë po ngjan tash e disa vite me klubet me renome si Prishtina, Vëllaznimi, Liria, pjesë e të cilave ka qenë Faton Domi dhe Favzi Rama, që nuk e vazhdojnë turneun për të lartpërmendurit.
Domi ka luajtur për Prishtinën dhe Vëllaznimin, ndërsa Rama për Prishtinën dhe Lirinë. Këto skuadra nuk guxojnë t‘i lënë në harresë këta emra, e as klubi i futbollit Dukagjini nga Klina, ku në territorin e kësaj komune, në fshatin Volljakë (me 22 nëntor 1987) Rama e Domi humbën jetën në një aksident komunikacioni.
Arbon Desku ka disa fjalë për komentin e Esat Mehmetit.
“Miku im çdo herë me lënë përshtypje postimi i juaj sa herë e lexoj.
Çdo herë penda juaj shkruan mirë e më mirë.
Shkrimet e tilla janë të mirëseardhura për ata të cilët kanë nevojë të mësojnë.
Nuk është turp të mësosh nga tjetri është dobi. Sa i përket turneve memoriale vërtet Kosova e pasluftës ka ngecur shumë, a thua pse vallë?
Nëpër botë klubet merren me organizim të turneve memoriale duke përkujtuar legjendat e veta të cilët nuk janë në mesin e tyre.
Klubet e kanë patjetër të domosdoshme të njoftojnë Federatën e Futbollit të Kosovës dhe institucioni duhet të zyrtarizoj turneun në kalendarin e garave.
Turne të tilla janë shumë të mirëseardhura sepse në radhë të pare përkujtojmë legjendat, nderojmë familjarët e tyre dhe bëhet përafrim i klubeve mes veti.
Për mos me zgjat shumë në koment ndoshta do të ishte mirë të mbahet një tryezë në këtë temë, shpresoj se këtë vit turneu Rama - Domi do të riaktivizohet dhe ndoshta do te ndikoj për të mire edhe turne tjera memorialë”, ka komentuar Desku.
