Anthony Martial nuk do të largohet nga Manchester United në merkaton e kësaj vere, të paktën kështu shkruan e përditshmja angleze “The Telegraph”. Media e njohur britanike duke cituar burim brenda klubit bën me dije se klubi nuk ka ndërmend të privohet nga cilësitë e lojtarit francez edhe pse ky i fundit nuk mund të konsiderohet si një nga lojtarët më të preferuar të trajnerit Ole Gunnar Solskjaer.
Vetëm dy ditë më parë u përfol për një interesim të Interit kundrejt 25- vjeçarit, madje u zbulua edhe shifra që ziklatrit ishin gati të shpenzonin për sulmuesin me origjinë nga Guadalupe, bëhej fjalë për 60 milion euro, megjithatë duket se për momentin United ka vendosur ta mbajë në skuadër.
Edicionin e shkuar të Premier Leagues, Anthony Martial zbriti në fushë si titullar në vetëm 17 ndeshje duke gjetur 4 herë rrugën e rrjetës.
Ky veprim i drejtuesve të klubit, gjithmonë nëse konfirmohet është një shenjë e qartë besimi kundrejt lojtarit i cili pretendon më shumë hapësira nga ana e trajnerit Solskjaer.
Martial erdhi tek Manchester United nga Monaco në vitin 2015 për 60 milion euro dhe deri më tani ka realizuar 78 gola në 258 ndeshje me fanellën e 20 herë kampionëve të Anglisë. Sulmuesi ka një kontratë deri në vitin 2024 me klubin britanik.
