Ky sezon do të jetë i pazakontë për Barcelonën dhe ndoshta një prej më të çuditshmëve për shumë vite. Largimi i Mesit i detyron katalanasit që të shohin mundësi të tjera për të vazhduar që të jenë konkurrues.
Kjo është ajo që kërkohet për të mbetur fitues: një skuadër që mund të fitojë edhe pa lojtarin më të mirë në botë.
Në këtë ekuacion, një figurë që fiton akoma më shumë rëndësi në rindërtimin e skuadrës është trajneri Ronald Kuman, i cili do të menaxhojë këtë projekt tranzicioni.
Lajmi i mirë është se holandezi duket njeriu perfekt për ta bërë këtë, duke treguar se ai nuk ka asnjë problem kur vjen puna për të marrë vendime. Ish-trajneri i kombëtares holandeze duket se ka një ide shumë të qartë se çfarë kërkon nga skuadra e tij dhe se si ta arrijë atë dhe e shfaqi këtë me fitoren në javën e parë të La Ligës kundër Sociedadit, pas së cilës ai tha se pa Barcelonën më të mirë të këtyre viteve të fundit.
