Kurt Zouma largohet nga Chelsea, por mbetet në Londër.
Francezi 26-vjeçar u transferua te skuadra e West Hamit për një shifër totale prej 30 milionë eurosh dhe firmosi një kontratë 5-vjeçare me “çekanët”.
Zouma iu bashkua Chelsea-t verën e 2014-ës si një nga mbrojtësit më premtues, por nuk arriti të lërë gjurmë te “blutë” e Londrës dhe një pjesë të mirë të kohës e kaloi në huazim në skuadra të tjera si Saint Ettiene, Stoke City apo Everton.
Megjithatë tani rrugët mes tij dhe kampionëve të Europës janë ndarë përfundimisht, ndërsa shitja e Zouma i hap udhë Chelsea-t të kompletojë transferimin e një tjetër mbrojtësi francez.
Bëhet fjalë për 22-vjeçarin e Sevillas, Jules Kounde, i cili ndiqet prej javësh nga londinezët dhe transferimi pritet të kompletohet në fillim të javës, për një shifër prej rreth 50 milionë eurosh në total, ndonëse klauzola e prishjes së kontratës së tij me andaluzianët është plot 80 milionë euro.
Vetë 22-vjeçari francez ka pranuar transferimin në Londër, aty ku e pret një rol i rëndësishëm në qendër të repartit të prapavijës dhe gjithashtu ka edhe një marrëveshje mes Chelsea-t e Sevillas, por gjithçka ka mbetur pezull, pasi andaluzianët nuk e kanë gjetur ende njeriun që do të zëvendësojë Kounde në qendër të mbrojtje.
