Ende është e vështirë të kuptohet Vedat Muriqi i vërtetë.
Sulmuesi i Lazios, i cili filloi sezonin e tij të dytë me bardhekaltrit, sigurisht që po bën çmos të bëhet një lojtar i rëndësishëm. Me Sarrin është një fillim i ri për të. Klubi ka vendosur ta mbajë atë, duke larguar Caicedo. Gjiganti kosovar konsiderohet tashmë zëvendësuesi i Immobile.
Ndërkohë, Vedati dërgon sinjale me fanellën e Kosovës: dy ndeshje dhe dy gola. Me kombëtaren e shfrytëzon më së miri praninë fizike, kapacitetin ajror, nuhatjen për portën kundërshtare. Tani do të kthehet te Lazio për të luajtur shanset e tij.
Një gol vendimtar kundër Greqisë, në fund të lojës, goli tjetër kundër Gjeorgjisë tri ditë më parë. Në mënyrën më direkte, Vedat Muriqi i dërgon kështu sinjale të qarta Lazios. Ai gjithmonë ka bërë mirë me ekipin e tij kombëtar. Në Romë luftoi në vitin e tij të parë, tani është gati të marrë atë që i takon me të drejtë.
I blerë për gati 20 milionë euro, është koha për ta shpaguar veten. Deri më sot, në këtë sezon ka luajtur 8 minuta kundër Empolit dhe 9 minuta kundër Spezia. Titullar është Immobile, por ai dëshiron të ndihet i rëndësishëm. Që nga kualifikueset me Kosovën i ka dërguar mesazhe të forta Sarrit.
