Liverpool kërkon të përfitojë nga barazimi i Chelsea kryesues, por transferta e sotme është ndër më të vështirat për “The Reds”, të cilët do të masin forcat me West Ham (17:30).
Dy pikë më shumë se kundërshtari i sotëm numëron Liverpool, që do tentojë suksesin e gjashtë radhazi jashtë fushe në të gjithë kompeticionet.
Jurgen Klopp i gëzohet formës së mirë sportive të djemve të tij, dhe në prononcimin e dhënë për Sky Sports tha:
“Nuk e konsiderojmë veten skuadra më e mirë në botë. Nuk na intereson një gjë e tillë, nuk kemi qenë kurrë skuadra më e mirë.
Çfarë duam? Ne duam të jemi në gjendje të mposhtim skuadrën më të mirë në botë, cilado qoftë ajo. Ky është objektivi ynë”, theksoi tekniku gjerman i Liverpool.
