Sot u zhvilluan dy ndeshjet e fundit të stinorit vjeshtor apo më saktë të javës së 18-të në BKT Superligën e Kosovës.
Gjilani e mbyll stinorin si kampion vjeshtor, duke lënë mbrapa Dritën dhe Ballkanin, shkruan Gazeta Olle. Kuqebardhët triumfuan ndaj Ballkanit në Suharekë, me rezultat minimal 1-0, dhe kështu renditen në vendin e parë në elitën e futbollit kosovar.
Ishte supergoli i Gerhard Prognit (75′), që ia solli fitoren gjilanasve.
Kapiteni i Gjilanit pas ndeshjes është shprehur i lumtur që goli i tij solli tri pikë dhe pozitën e parë në renditje në fund të stinorit vjeshtor të Superligës në futboll.
“Është kënaqësi të shënoj gola të tillë. Jemi një grup shumë i mirë dhe mund të them që kjo fitore i dedikohet tifozëve tanë.
Është e rëndësishme të jemi kampion vjeshtor por e rëndësishme është që po e shijojmë momentin dhe futbollin. Jemi në gjysmën e rrugës dhe kemi bërë shumë mirë deri më tani. Do të japim maksimumin që të arrijmë rezultate pozitive”, deklaroi Progni.
