Është ndarë nga jeta të mërkurën në moshën 82-vjeçare, kroati Stjepan Lamza, një nga futbollistët më të mirë në historinë e Dinamos së Zagrebit.
Lamza u paraqit për të kaltrit nga viti 1960 deri në vitin 1967, ai është më meritori që zagrebasit fituan Kupën e Qyteteve, ndërsa ish-shoku i tij të skuadra e Dinamos, Rudi Belin, ka treguar një moment interesant të viteve të 60-ta.
“Ai një herë ishte aq i dehur sa nuk e dinte as me kë po luante", ka deklaruar para një kohe, Belin.
“Ne ishim duke qëndruar në tunel, duke u përgatitur për të dalë jashtë. U përpoqa të përqendrohesha te lojtari që duhej të ruaja kur Lamza mu afrua dhe më pyeti: ‘Shoku, kur do të luajmë dhe kundër kujt?"
Kundërshtari atë ditë nuk ishte askush tjetër veç Cërvena Zvezdës dhe luajtëm në ‘Marakana’ para 100 mijë njerëzve. Lamza shënoi dy gola dhe i kërkoi trajnerit që ta nxirrte jashtë në pjesën e parë”, tregon Belin.
Vetë Lamza i është referuar dikur fjalëve të Belinit në një intervistë për portalin “4-4-2” dhe ka kujtuar atë ndeshje.
“Nuk jam i sigurt nëse unë dhe Belin po flasim për të njëjtën ndeshje, por një herë i dhashë dy gola Zvezdës dhe kërkova të dilja. Thjesht mendova se duhet të luante edhe dikush tjetër. Pse të kaloj të gjitha 90 minutat në fushë”, kishte thënë Lamza.
