Partizani vijon me ritëm të plotë përgatitjet për ndeshjen e sotme në orën 13:45 në transfertë ndaj Egnatias, e para përballje zyrtare për këtë vit kalendarik.
Stërvitja e djeshme ishte e gjitha taktike dhe e dedikuar për ndeshjen ndaj rrogozhinasve, e vlefshme për javën e 16-të të Kategorisë Superiore.
Para zbritjes në fushën e lojës, Mehmeti, i asistuar nga ndihmësi i tij, Fatjon Tafaj, kanë kryer videoanalizën e sfidës, ku kanë studiuar kundërshtarin deri në detajet më të vogla.
Më pas, stafi dhe ekipi u zhvendosën në terren, kur në orën 10:00 lojtarët dhe stafi teknik zbritën në fushën e lojës. Gjithçka nisi me një nxehmje jo shumë intensive, siç Sakone është mësuar t’i bëjë e më pas skuadra nuk e lëshoi topin nga këmbët.
Trajneri Mehmeti i vendosi ata në dy rreshta dhe i organizoi një lojë, e cila ndihmonte zhvillimin e reflekseve te të gjithë. Pas kësaj, ekipi u nga në disa grupe për të luajtur në kuadrate, që si gjithmonë ishte një lojë, e cila prodhoi entuziazëm dhe ilaritet. Në vijim vëmendja ishte te vendosja e nesërme.
Trajneri e ndau skuadrën në dy ekipe, titullarët dhe rezervat, dhe u testuan disa module, teksa nesër pritet që rreshtimi të jetë me katër mbrojtës.
Interesant ishte fakti që faza e sulmit u duk të funksiononte shumë mirë, me lojtarët, që u shfaqën të saktë në finalizim.
Stërvitjen nga lart, te kafja e kompleksit e ndoqën edhe drejtori teknik, Dritan Dervishi dhe Genc Tomori, drejtori i akademisë së kuqe.
Për t’u veçuar ishte se Dervishi qëndroi vazhdimisht në këmbë dhe bisedoi në shumicën e kohës në telefon, ndërsa Tomori qëndroi qetësisht i ulur dhe shijoi stërvitjen e të kuqve.
Të dy e panë deri në fund seancën dhe më pas iu bashkuan skuadrës në dhomat e zhveshjes. Në orën 11:17 trajneri Mehmeti fërshëlleu për herë të fundit.
Pedro dhe Agbekpornu janë ndoshta dy “blerjet” më të rëndësishme të Egnatias.
Të dy lojtarët kanë qenë shumë të rëndësishëm në fazën e parë të sezonit dhe me dëmtimet e tyre kishin lënë shumë boshllëqe, që ndikuan më pas edhe në rezultatet e ekipit.
Me rikthimin e tyre trajneri Zekirija Ramadani fiton dy “fuqi” më shumë dhe pritet t’i përdorë menjëherë të dy në ndeshjen ndaj Partizanit.
