Interi nuk po kalon një moment të mirë në kampionat, teksa në dy ndeshjet e fundit ka marrë nga një pikë duke humbur dhe vendin e parë në renditje. Eleminimi nga Liga e Kampionëve gjithashtu i ka vështirësuar gjërat.
Kjo duket se ka bërë që tifozët të kundërvihen ndaj skuadrës dhe ta ‘braktisin’. Ultrasit e quajtur “Curva Nord” kanë lajmëruar se nuk do të jenë të pranishëm në stadium në ndeshjen e të dielës, kundër Juventusit. Braktisja e skuadrës në një ndeshje kaq të rëndësishme si derbi i Italisë tregon se situata brenda kampit zikaltër nuk është aspak e qetë.
Në një komunikatë në Facebook, ultrasit kanë njoftuar vendimin, duke mos shpjeguar arsyet e zgjedhjes me qëllimin për të mos krijuar polemika.
“Nuk do të japim shpjegime për të mos i dhënë mundësi atyre që nuk vlejnë të krijojnë polemika të kota. Kemi arsyet tona dhe kjo duhet të mjaftojë për të gjithë ata që e lexojnë këtë komunikatë, ju mjafton të dini që kjo është një zgjedhje e pranuar nga të gjithë anëtarët e grupit. Një zgjedhje e dhimbshme por e paevitueshme.
Asnjë ndeshje e radhës, as ajo më e rëndësishmja, nuk do mundi kurrë të zbehë esencën e asaj çka jemi. Ne jemi të gjithë ata që të bashkuar bëhen një”, ka përmbyllur komunikatën grupi ultras zikaltër.
