Agim Ademi rizgjidhet kryetar i FFK-së: Vota për mua është votë për zhvillimin e futbollit

06.04.2022 - 11:09

Nis Kuvendi Zgjedhor i FFK-së

Ka filluar Kuvendi Zgjedhor i Federatës së Futbollit të Kosovës ku pritet të zgjidhet presidenti i ri i kësaj federate.

Kandidat i vetëm për këtë pozitë është kryetari aktual Agim Ademi.

Ky kuvend po mbahet pa praninë e mediave.

06.04.2022 - 11:01

Zyrtarë të KOK-ut arrijnë në FFK

Në Federatën e Futbollit të Kosovës pritet që me fillim nga ora 11:00 të fillojë Kuvendi Zgjedhor për zgjedhjen e kryetarit të saj.

Në garë për këtë post është vetëm kandidati aktual Agim Ademi.

Tashmë në ambientet e federatës kanë arritur edhe zyrtarë të Komitetit Olimpik të Kosovës, Presidenti Ismet Krasniqi dhe zëdhënësi për media Kushtrim Krasniqi, raporton KosovaPress.

Kujtojmë se ky kuvend i FFK-së po mbahet pa praninë e mediave.

06.04.2022 - 10:39

Zgjedhjet në FFK, mediat nuk lejohen as në oborrin e Federatës

Zgjedhjet në FFK, mediat nuk lejohen as në oborrin e Federatës.

Me fillim nga ora 11:00 Federata e Futbollit të Kosovës fillon zhvillimin e Kuvendit Zgjedhor të kësaj federate ku edhe do të zgjidhet presidenti i ri i saj.

Pak minuta para fillimit të kuvendit, mediat dhe gazetarët e interesuar nuk janë lejuar as në oborrin e federatës, por janë duke qëndruar jashtë rrethojave të këtij objekti, raporton KosovaPress.

Agim Ademi, kryetari aktual i FFK-së është kandidati i vetëm për të marr këtë post.

06.04.2022 - 08:40

Sot kuvendi zgjedhor i FFK-së, në letër vetëm një opsion

Sot do të mbahen punimet e Kuvendit të Rregullt Zgjedhor për kryetar të Federatës së Futbollit të Kosovës (FFK).

Punimet e Kuvendit do të mbahen në selinë e FFK-së në orën 11:00.

Kujtojmë se kandidat i vetëm në garë për një mandat katërvjeçar është Agim Ademi, njëherit kryetar aktual i institucionit më të lart të futbollit në vend.

Për këtë përfaqësuesit e dy institucioneve më të mëdha në botën e futbollit, UEFA-s dhe FIFA-s arrijnë dje në Kosovë.

Dy përfaqësues të UEFA-s dhe dy përfaqësues të FIFA-s kanë arritur në Kosovë, një ditë para Kuvendit zgjedhor në Federatën e Futbollit të Kosovës, për të monitoruar këtë proces.