Robert Lewandowski ka shkruar historinë e Bayern Munih në këto vite.
Por brenda pak ditësh ai është kthyer nga një idhull, në një personazh të cilin tifozët bavarezë nuk e shohin më si të tillë dhe këtë ia kanë bërë të qartë edhe në ndeshjen e sotme në Ligën e Kampioneve ndaj Villarealit.
Në vend të parullës që si zakonisht mbështet dhe i jep zemër ekipit para ndeshjeve të tilla, ultrasit e Bayernit kanë shpalosur një foto gjigande të legjendës Gerd Muller. “Bomber për përjetësinë”, shkruhej poshtë saj, duke treguar kështu se kush ishte idhulli i vetëm i bavarezëve.
Një mesazh për Levandovskin, në një periudhë kur raportohet se polaku i ka kërkuar klubit që ta lejojë të largohet në verë, me destinacion Barcelonën.
Një situatë që nuk u ka pëlqyer ultrasve të cilët kanë bërë të qartë me parullën e sotme se pavarësisht kontributit të tij dhe rekordeve të shumta, për ta Levandovski nuk do të kalonte kurrë legjendën Muller.
