Ralf Rangnik ka konfirmuar se ekipi do të jetë me vetëm 14 lojtarë të disponueshëm për ndeshjen e sotme ndaj Çelsit. Sfida është paraprirë për shkak se “Blutë” do të luajnë më 14 maj në finalen e FA Cup kundër Liverpulit. Në fakt, takimi i sotëm i përket javës së 37-të, por ka qenë finalja që ka detyruar këtë lëvizjet.
Ndërkohë, mësohet se Herri Meguajër dhe Xhejdën Sanço iu bashkuan listës së lëndimeve. Kapiteni ka një lëndim në gju, ndërsa anësori vuan nga bajamet, ndërkohë që dihet se Pogba, Fred, Kavani dhe Shoudo do të mungojnë gjithashtu. Trajneri i “Djajve të kuq” pranoi se shanset e ekipit të tij për të përfunduar në top katërshe dhe për t’u kualifikuar në Champions-in e sezonit të ardhshëm janë të pak ta. Duke folur për disponueshmërinë e lojtarëve, tekniku gjerman tha:
“Fred për fat të keq nuk është ende gati. Ai u përpoq të stërvitej dhe më pas pata një bisedë me të dhe me një lojtar si Fredi nuk ka kuptim me një dëmtim muskulor ta luajmë shumë herët pasi ai do të rrezikonte të ridëmtohej.
Do të përpiqemi të luajmë me ekipin më të mirë të mundshëm, por tani për tani kemi 14 lojtarë të disponueshëm.
Po mendoj të grumbulloj katër lojtarë të rinj që do të jenë pjesë e skuadrës në mënyrë që të përballojmë disi këtë moment emergjence”. Çelsi, Brentford, Brajton dhe Kristal Palas janë etapat që i presin “Djajtë e kuq” për të bërë një tentativë të dëshpëruar për t’u përfshirë në Champions.
Me Arsenalin që qëndron 6 pikë larg, misioni duket i pamundur, megjithatë Rangnik nuk ka ndër mend të dorëzohet. “Duhet të jemi realistë. Edhe nëse fitojmë katër ndeshje, nuk është në duart tona. Edhe për sezonin e ardhshëm, është e rëndësishme të përfundoni me pozicionin më të mirë të mundshëm.
Kemi edhe katër ndeshje për të luajtur. Dy ndeshjet e ardhshme janë në shtëpi dhe pa dyshim që do të përpiqemi të marrim sa më shumë pikë dhe të fitojmë sa më shumë ndeshje që të jetë e mundur.
Për ta bërë këtë, duhet të luajmë në nivelin më të mirë që mundemi. Ne e dimë nëse luajmë mirë, është e mundur të fitojmë ndeshjen me Çelsin, por edhe ato që do të pasojnë”, përfundoi Rangnik në konferencën e tij për mediat.
