Kombëtarja e Kosovës U16 në konkurrencën e meshkujve ka shënuar fitore në ndeshjen e parë në turneun zhvillimor të UEFA-s që po mbahet në Shkup.
Të përzgjedhurit e Arsim Abazit kanë fituar në duel me Hondurasin, me rezultat 2:0. Golat për Dardanët e rinj i shënuan Medin Gashi dhe Fatjon Mulaj.
Në këtë turne Abazi ka në dispozicion 16 futbollistë nga klubet vendore dhe 4 futbollistë nga klubet evropiane.
Krahas Kosovës dhe Hondurasit në turne po marrin pjesë edhe Maqedonia e Veriut dhe Taxhikistani.
Përzgjedhësi Abazi u shpreh i kënaqur me fitoren e arritur në ndeshjen e sotme, por theksoi se vërehet se tek futbollistët vendorë ka ngecje në përgatitjen fizike. ]
“Kjo është një fitore e rëndësishme për t’i dhënë motivë futbollistëve tanë.
Duke pasur parasysh se ky grup i futbollistëve është së bashku për herë të parë, atëherë mund të jemi të kënaqur. Megjithatë, shihet se tek lojtarët përgatitja fizike nuk është në nivelin e duhur.
Në pjesën e parë luajtëm më dobët, derisa në të dytën u vërejt angazhimi dhe dëshira e futbollistëve për të fituar”, ka thënë Abazi.
Ndeshjen e radhës Kosova do të ballafaqohet me Maqedoninë e Veriut më 5 maj, derisa në ndeshjen e fundit ballafaqohet me Taxhikistanin, me 8 maj.
