Fanella e veshur nga Diego Maradona kur shënoi golin famëkeq "Dora e Zotit" në çerekfinale të Kupës së Botës në vitin 1986 kundër Anglisë, është shitur në ankand për një shumë marramendëse.
Legjenda e Napolit shënoi golin famëkeq në çerekfinale të Kupës së Botës 1986 kundër Anglisë, një moment përcaktues ky i karrierës së tij. Në të njëjtën lojë, ai shënoi atë që atëherë është quajtur 'goli i shekullit' pas një driblimi të pabesueshëm prej 60 metrash, përcjellë KosovaPress.
Siç raportohet nga “Sky Sports”, fanella e “Dorës së Zotit” të Maradonës është shitur për 7,142,500 funte në ankand tek një blerës aktualisht i panjohur, duke u bërë fanella më e shtrenjtë e futbollit e shitur ndonjëherë. Ky titull mbahej më parë nga një fanellë e Peles e veshur në finalen e Kupës së Botës 1970, e cila u shit për 157,750 funte në mars të vitit 2002.
Disa polemika kanë shpërthyer si rezultat i vendimit të ish-lojtarit anglez Steve Hodge për të nxjerrë fanellën në shitje, me zyrtarët e Federatës Argjentinase të Futbollit që kërkonin për ta çuar fanellën në një muze të Maradonas në Buenos Aires. Hodge luajti në atë çerekfinale të Kupës së Botës dhe ndërroi fanellat me legjendën e Napolit pas ndeshjes.
