Skuadra shqiptare, Deçiqi, për herë të dytë rresht është në finalen e Kupës së Malit të Zi.
Futbollistët e Deçiqit dje dhuruan lojë të madhe sidomos në 20 minutat e fundit, ku përmbysën rezultatin e Iskrës, duke fituar me 2:1.
Skuadra nga Tuzi do të ballafaqohet në finale me Buduçnostin e Podgoricës e cila luhet me 29 maj (20.30).
Kush është president i klubit të Deçiqit, që po bën histori?
Është Pal Dreshaj, një burrë i matur e me vizione të qarta, i cili me punën që po bën me stafin e tij, ka lartësuar ekipin në nivelet më të larta.
Dreshaj tani e dy vite e gjysmë është president i klubit, por për këtë periudhë ekipin dy herë e çoi në finale të Kupës së Malit të Zi dhe dy herë u kualifikuan në garat evropiane.
Dreshaj po bën historinë me ekipin e tij dhe tani synon Kupën e Malit të Zi, për herë të parë të ekzistimit si klub, që u themelua në vitin 1926, para 96 viteve. Deçiqi renditet në vend të tretë me 50 pikë pas 32 jave në kampionatin malazez.
