Tirana 5×5 është skuadra fituese e Kampionatit Kombëtar të Futbollit 5×5 për edicionin futbollistik 2021-2022, pasi mundi në finale Beautiful Albania me rezultatin 4-3.
Në këtë ndeshje të fundit për këtë edicion, që erdhi pas një kampionati të gjatë dhe mjaft të luftuar, Tirana 5×5 ia doli të kurorëzohej si kampione e Shqipërisë në këtë kompeticion, teksa disa javë më parë ia doli të shpallej kampione edhe për zonën e Tiranës.
Në sfidën e zhvilluar mbrëmjen e kaluar në kompleksin “East Park” skuadrat dhuruan spektakël, duke shënuar 7 gola në total, ndërsa në fund buzëqeshi ekipi i Tirana 5×5.
Kupa dhe medaljet për fituesit u dorëzuan nga drejtuesi i Departamentit të Futbollit Amator në Federatën Shqiptare të Futbollit, Jurgen Demneri.
Kampionati Kombëtar i Futbollit 5×5, i organizuar nga Federata Shqiptare e Futbollit mbylli kështu edicionin e tij të dytë, duke arritur një sukses të jashtëzakonshëm dhe duke u organizuar në disa zona të vendit, me qindra ekipe të regjistruara, me qëllim rritjen dhe masivizimin e lëvizjes futbollistike amatore për të apasionuarit e sportit më popullor për shqiptarët.
